Չարենցավանում Chevrolet Volt-երի թալան է սկսվել․ ինչո՞վ են զբաղված իրավապահները

Չարենցավանում նորից գողությունների «շքերթ» է սկսվել։ Մի ժամանակ ինչ-որ խումբ մտել ու բնակարաններ էր թականում, հիմա էլ մեքենաներ են թալանում, հատկապես՝ Chevrolet Volt մակնիշի։ Այս մեքենաների արտաքին մասերը՝ բամպեր, լուսարձակ և այլն, շատ թանկ արժեն և մեծ պահանջարկ ունեն թալանչիների մոտ։ 

Մենք տեղեկացանք, որ մի քանի օր առաջ ինչ-որ խումբ Չարենցավանում մի քանի այդպիսի Volt է թալանել։ Գիշերվա կեսին երկու-երեք հոգանոց խմբով մտել են կոնկրետ բակեր, որտեղ արդեն նախապես ֆիքսել էին իրենց «զոհերին» ու շատ արագ իրենց սև գործը տեսել։ Հիմնականում քանդում-տանում են Volt-ի առջևի հատվածը։ Այդպիսի մի Volt էլ երկու օր առաջ են թալանել՝ ամբողջ առաջամասը ապամոնտաժելով և տանելով։ Մեքենայի տերը MediaHub-ին ասաց, որ գողությունը կատարել են լուսադեմին՝ ժամը 05-05:30-ի սահմաններում։ Դիմել է ոստիկանություն, հաղորդում են վերցրել, փոխանցել են Քննչական կոմիտե, եկել են քրեագետները, մատնահետք են վերցրել, բայց ոչ մի հույս չեն տվել, որ կբացահայտվի։

Առհասարակ, Չարենցավանում հաճախակի են այսպիսի դեպքեր տեղի ունենում, և քաղաքի ոստիկանությունը կա՛մ անգործության է մատնված, կա՛մ չի կարողանում բացահայտել ու կանխել նման դեպքերը, կա՛մ բռնում են, ու չեն կարողանում ապացուցել, և մի քանի օր անց բաց են թողնում։

Այստեղ իր դերակատարությունն ունի նաև Քննչական կոմիտեն, քանի որ, եթե նույնիսկ ոստիկանությանը հաջողվում է պոտենցիալ հանցագործներին հայտնաբերել ու բերման ենթարկել, ապա Քննչական կոմիտեն նրանց շատ հեշտ բաց է թողնում, քանզի չեն կարողանում անգամ գողոնը ձեռքը բռնած մարդուն ապացուցել, որ ինքն է կատարել այդ հանցանքը։ Թե ինչու չեն կարողանում, դա էլ թող իրենք խոստովանեն։ Համենայնդեպս, փաստ է, որ ո՛չ ոստիկանությունը, այդ թվում՝ Չարենցավանի բաժինը, ո՛չ Քննչականը չեն ուզում կամ չեն կարողանում արդյունավետ ու պրոֆեսիոնալ գործել, փոխարենը՝ մեղքը իրար վրա են գցում կամ իրենց իշխանավորների գրած օրենքների։