Ծայրահեղ ոչ մի խնդիր չկա. փոխվարչապետը՝ օդի աղտոտվածության մասին

Ամենապրոբլեմատիկ հարցն այն է, որ Հայաստանի Հանրապետությունում և, մասնավորապես, Երևանում սենսորների քանակը, որից ստացած ինֆորմացիայի միջինացման արդյունքում կարելի է օբյեկտիվ պատկեր ստանալ, իրականության մեջ քիչ է: Այդ մասին Ազգային ժողով-Կառավարություն հարցուպատասխանի ժամանակ ասաց ՀՀ փոխվարչապետ Մհեր Գրիգորյանը՝ անդրադառնալով օդի աղտոտվածության խնդրին և այդ մասով ահազանգող տվյալներին:

«Այսինքն՝ աժիոտաժի հիմնական պատճառն ինչի՞ է, որ հենց շինարարական օբյեկտներում կամ հենց այն վայրերում, որտեղ, իրոք, այդ խնդիրը սուր է, տեղադրված են սենսորներ, որոնց տված ինֆորմացիայի միջինացումն իրոք տալիս է շատ պրոբլեմատիկ պատկեր:

Բայց, անկեղծ ասած, այդքան էլ այդպես չէ, ինչքան որ մենք հրապարակային տեսնում ենք գնահատականներ, որովհետև, ըստ գործող ստանդարտի, որպեսզի միջինացված պատկերի միջինացված գնահատական լինի, այդ սենսորներից պիտի դրված լինի նաև այն վայրերում, որտեղ չկա շինարարություն կամ որևէ վնասակար գործունեություն:

Այդ իմաստով երկու խնդիր ենք հիմա լուծելու. մեկը տեսչական մարմինների գործառույթի լավարկումն է, որպեսզի, իրոք, գործառույթը նպատակին հասցվի, և երկրորդը, այնուամենայնիվ, տեխնիկական հագեցվածության խնդիր կա, որը նույնպես պիտի լուծվի ու ճիշտ քարտեզով, որպեսզի միջինացված պատկերը ճիշտ լինի, և գնահատականները ճիշտ տրվեն»,- ասաց նա:

Այս պահին, ըստ փոխվարչապետի, գնահատականները վկայում են այն մասին, որ կան լոկալ խնդիրներ և օդի աղտոտվածություն լոկալ վայրերում, բայց մեծ պատկերն աժիոտաժի հետ բացարձակ կապ չունի:

«Եթե նայենք մեծ պատկերով՝ միջինացված ինչ է, ծայրահեղ ոչ մի խնդիր չկա»,- ասաց նա՝ հորդորելով քաղաքացիներին հանգիստ լինել, որովհետև մեծ պատկերում այս պահին անհանգստացնող որևէ բան չկա: