Վարորդներին տրվող 9 տուգանային միավորը կդառնա 13. 7 խախտման դեպքում բալերը կավելացվեն. մանրամասներ (տեսանյութ)

Վարորդներին մեկ տարվա համար տրվող 9 տուգանային միավորը հնարավոր է՝ դառնա 13։

Ազգային ժողովի նախագահ Ալեն Սիմոնյանը, փոխնախագահ Ռուբեն Ռուբինյանն ու «Քաղաքացիական պայմանագիր» խմբակցության պատգամավոր Արմեն Խաչատրյանն են փոփոխությունը նախաձեռնել՝ ««Վարչական իրավախախտումների վերաբերյալ օրենսգրքում» փոփոխություններ կատարելու մասին» օրենքի նախագծով։

Ինչպես սոցցանցի իր էջում գրել է Սիմոնյանը, փոփոխությունը բազմաթիվ վարորդների խնդրանքով է արվել։ Ավելի կոնկրետ, ըստ նրա, նախաձեռնության առաջարկը եկել է մասնավորապես տաքսու վարորդներից, ինչպես նաև՝ տեղափոխությամբ զբաղվող վարորդներից։

«Հայկական ժամանակ»-ի հետ զրույցում նախագծի համահեղինակ Արմեն Խաչատրյանն ասում է՝ տարիներ առաջ, երբ Հայաստանում սկսվեց կիրառվել տուգանային միավորների համակարգը, նախատեսված էր, որ որոշ ժամանակ անց հետօրենսդրական վերահսկողության շրջանակներում պետք է վերլուծություն արվի, թե համակարգը ինչպես է աշխատում։

Վերջին մի քանի տարվա ընթացքում տրանսպորտային միջոցների քանակը կրկնակի աճել է, ինչն էլ, Խաչատրյանի խոսքով, լուրջ խնդիրներ է առաջացրել։

Պետությունը գնացել է բալային համակարգի ներդրմանը, որովհետև մարդիկ խախտումն անում էին, վճարում տուգանքն ու նորից շարունակում վարել տրանսպորտայի միջոցը, հիշեցնում է պատգամավորն ու հավելում, որ դրա հետևանքով խախտումների քանակն էլ էր մեծ, իսկ բալային համակարգից հետո թիվը նվազել է։ Այժմ 13 բալը բավարար է, որ մնացած խնդիրները լուծվեն, կարծում են նախագծի հեղինակները:

Բալային համակարգը բավականին արդարացված ու կարևոր համակարգ է, համոզված է Խաչատրյանը, որովհետև, ըստ նրա, էականորեն զսպում է վարորդների կողմից իրավախախտումներ կատարելու ցանկությունը, հատկապես՝ դիտավորությամբ։

9-13-ով փոխարինելուց բացի, այս նախագծով նաև 7 խախտման դեպքում բալերը կավելացվեն:

Օրենքն ուժի մեջ մտնելու պահին վարելու իրավունքը կասեցված անձանց 13 տուգանային միավորը կհատկացվի կասեցման ժամկետի ավարտի հաջորդող օրը։

Ազգային ժողովը դեռ պետք է քննարկի նախագիծը, ընդունվելուց հետո օրենքն ուժի մեջ կմտնի այս տարվա մայիսի 1-ից։

Առավել մանրամասն՝ ռեպորտաժում: