Դպրոցից հետո անմիջապես փողոց էինք դուրս գալիս, հիմա դա անվտանգ չէ․ Մեսսի

«Ինտեր Մայամիի» հարձակվող Լիոնել Մեսսին պատմել է Արգենտինայում անցկացրած իր մանկության մասին՝ մինչ «Բարսելոնա» տեղափոխվելը։ 37-ամյա հարձակվողը YouTube-ի Apple Music ալիքին տված հարցազրույցի ժամանակ նշել է․

«Ինչպե՞ս էր անցնում իմ օրը Ռոսարիոյում։ Ես գնում էի դպրոց։ Ճիշտ է, տարրական դասարանների դասերը սկսվում էին կեսօրից հետո, այնպես որ երկար քնում էի, ապա ուտում և գնում դպրոց։ Դպրոցից հետո անմիջապես դուրս էի գալիս փողոց, որտեղ շատ ժամանակ էի անցկացնում։ Այն ժամանակ ամեն ինչ այլ էր, հատկապես Արգենտինայում։

Ես շատ ժամանակ էի անցկացնում հարևանությամբ ապրող ընկերներիս հետ։ Մենք ֆուտբոլ էինք խաղում և այլն։ Հաճախ մինչև ուշ գիշեր խաղում էինք։ Այսօր երեխաների համար երեկոյան փողոցում անվտանգ չէ՝ ոչ միայն Արգենտինայում, այլ ամբողջ աշխարհում։ Ինձ դուր էր գալիս ընկերներիս հետ ժամանակ անցկացնելը։ Երբ տեղափոխվեցի Բարսելոնա, շատ բաներ փոխվեցին։ Ես կորցրեցի այն ամենը, ինչով ապրում էի ամեն օր։ Շատ դժվար էր»,- Armsport-ի փոխանցմամբ՝ նշել է Մեսսին։

Մեսսին «Բարսելոնայի» ակադեմիա տեղափոխվել է 2000 թվականին, երբ 13 տարեկան էր։ Կատալոնական ակումբի հիմնական կազմում նա անցկացրել է 778 խաղ, խփել 672 գոլ և կատարել 303 գոլային փոխանցում։