Մեսսին և Սուարեսը տուգանվել են ՄԼՍ-ի կարգապահական կոմիտեի կողմից

ՄԼՍ-ի կարգապահական կոմիտեն տուգանել է «Ինտեր Մայամիի» ֆուտբոլիստներ Լիոնել Մեսսիին և Լուիս Սուարեսին՝ «Նյու Յորք Սիթիի» խաղացողների նկատմամբ ֆիզիկական ներգործության համար: Տուգանքի չափը չի հրապարակվել:

Փետրվարի 23-ին «Ինտեր Մայամին» 2:2 հաշվով ոչ-ոքի խաղաց «Նյու Յորք Սիթիի» հետ: Գոլերի հեղինակներ դարձան Թոմաս Ավիլեսը (5-րդ րոպե) և Տելասկո Սեգովիան (90+10), իսկ Մեսսին կատարեց երկու գոլային փոխանցում: 23-րդ րոպեին Ավիլեսը կարմիր քարտ ստացավ, և թիմը շարունակեց խաղը 10 հոգով:

Հանդիպման ավարտից հետո Մեսսին վիճեց գլխավոր մրցավարի հետ և ստացավ դեղին քարտ, այնուհետև բռնեց մրցակցի մարզչական շտաբի անդամ Մեհդի Բալուչիի պարանոցից, ինչի համար տուգանվեց: Սուարեսը երկրորդ խաղակեսում բռնեց «Նյու Յորք Սիթիի» խաղացողի պարանոցից, ինչի համար նույնպես տուգանվեց:

Մեսսին «Ինտեր Մայամիում» է 2023 թվականից, իսկ Սուարեսը միացել է 2023-ի դեկտեմբերին: Նախորդ մրցաշրջանում «Ինտեր Մայամին» հաղթել էր ՄԼՍ-ի կանոնավոր առաջնությունում և իրավունք ստացել մասնակցելու 2025 թվականի Աշխարհի ակումբային առաջնությանը:

Հաջորդ խաղում, որը նախատեսված է մարտի 2-ին, «Ինտեր Մայամին» կհանդիպի «Հյուսթոն Դինամոյի» հետ, փոխանցում է Armsport-ը։