Շվեյցարիան նոր պատժամիջոցներ կսահմանի Ռուսաստանի դեմ

Շվեյցարիան, հետևելով ԵՄ-ին, ընդլայնում է Ռուսաստանի դեմ պատժամիջոցների ցանկը, որն ընդունվել է Բրյուսելից պատժամիջոցների 15-րդ փաթեթի շրջանակում։ Ինչպես տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին ասված է երկրի Դաշնային խորհրդի կայքում հրապարակված հայտարարության մեջ։

«2025 թվականի փետրվարի 12-ին Դաշնային խորհուրդը որոշեց միանալ Ռուսաստանի դեմ ԵՄ-ի կողմից սահմանված պատժամիջոցների 15-րդ փաթեթին։ Նոր միջոցներն ուժի մեջ են մտնում 2025 թվականի փետրվարի 13-ից»,- նշված է հայտարարության մեջ։

Հստակեցվում է, որ Շվեյցարիան այժմ արգելում է որոշ դատական ​​որոշումների ճանաչումն ու կատարումը, որոնց համաձայն՝ ռուսական դատարանները պահանջում են բացառիկ իրավասություն ռուսական և շվեյցարական ընկերությունների միջև վեճերում։

Շվեյցարիան ԵՄ-ի կամ ՆԱՏՕ-ի անդամ չէ, սակայն Բեռնը միացել է Ռուսաստանի Դաշնության դեմ գրեթե բոլոր եվրոպական պատժամիջոցներին 2022 թվականի փետրվարի 24-ից ի վեր։ Շվեյցարիայի իշխանությունները պատժամիջոցների շրջանակում արգելափակել են ռուսական մասնավոր ակտիվները, որոնց արժեքը կազմում է 8,8 միլիարդ դոլար: Շվեյցարական Credit Suisse բանկը արգելափակել կամ սառեցրել է Շվեյցարիայում գրանցված ռուսական ակտիվների ավելի քան մեկ երրորդը՝ ավելի քան 19,7 միլիարդ դոլարի չափով:

Շվեյցարիայի կառավարությունը նաև հայտնել է, որ երկրում արգելափակված են Ռուսաստանի Կենտրոնական բանկի մոտ 8,45 մլրդ դոլարի ակտիվները։ Բացի այդ, Բեռնը պատրաստ է մասնակցել միջազգային քննարկումներին՝ Ռուսաստանի Դաշնության սառեցված ակտիվների բռնագրավման հարցի շուրջ։