Ի՞նչ անել, երբ Telcell-ի ապարատը ո՛չ 50 դրամանոց է ընդունում, ո՛չ էլ մանր տալիս․ պարզաբանում

Երևանի քաղաքապետարանի ներկայացրած հերթական «բարեփոխումը», ըստ որի՝ քաղաքացիները հանրային տրանսպորտից օգտվելիս յուրաքանչյուր ուղևորության համար պետք է վճարեն 150 դրամ՝ որոշված 300-ի փոխարեն, հերթական գլխացավանքն է դառնալու քաղաքացիների համար։

Շարքային քաղաքացին, եթե անգամ չբոյկոտի և ցանկանա վճարել 150 դրամ սահմանված ուղեվարձը, Telcell ապարատից օգտվելիս խնդրի է բախվելու։ Այս սարքերը չեն ընդունում 50 դրամանոց, նաև մանր չեն վերադարձնում։ Այսինքն՝ 200 դրամ վճարելու դեպքում քաղաքացու 50 դրամը մնում է օդում։

Telcell ընկերությունից MediaHub-ին հավաստիացնում են՝ գումարը չի կորելու, այն կա՛մ փոխանցվելու է տվյալ մարդու հեռախոսահամարին, կա՛մ Telcell դրամապանակին, եթե քաղաքացին ունի։ Իսկ եթե մարդն ուզում է մանրը կանխիկ տարբերակով ստանալ, ապա պետք է իր վճարման կտրոնը վերցնի, մոտենա Telcell-ի մոտակա մասնաճյուղ և վերցնի 50 դրամ մանրը։

«Այս երեք տարբերակն ենք մենք առաջարկում, սա է այս պահին։ Հիմա էլ այդպես է, այսինքն՝ այս կարգը գործում է, մանրը այս տարբերակներից մեկով փոխանցվում է քաղաքացուն»,- մեզ հետ զրույցում ասացին Telcell ընկերությունից։

Դիտարկմանը, որ այս դեպքում քաղաքացու համար հավելյալ խնդիր է առաջանում, ընկերությունից արձագանքեցին՝ իրենք կատարող են, և այս պահին սա է իրենց առաջարկած պայմանը։

Հարցին, թե արդյո՞ք ապարատները հագեցնելուն միտված քայլեր կարվեն, որ 50 դրամանոց ընդունելու կամ մանր տալու հնարավորություն լինի, Telcell ընկերությունից պատասխանեցին՝ նման քննարկում դեռևս չկա։

Նկատենք, այս խնդրին անդրադառնալիս ՔՊ-ականները լուծման տարբերակ են առաջարկել. 300 դրամ վճարելով՝ միանգամից երկու ուղետոմս գնել։

Իսկ այն, որ կան մարդիկ, որ ընդամենը մեկ ուղետոմս գնելու կարիք ունեն, քաղաքապետարանը, փաստացի, չի դիտարկել։ Ուստի այս «բարեփոխումը» ևս բոլորի համար չէ, ավելին, շատերի համար ուղղակի գլխացավանք է։