ՀՀ-Ադրբեջան երկկողմ խոսակցություն կա, կոնկրետ առաջարկներ ենք ուղարկել ապաշրջափակման մասին. Հովհաննիսյան

Բանակցությունների ֆորմատի վերաբերյալ չեմ ցանկանում որևէ բան բացառել, մենք ասել ենք՝ այնտեղ, որտեղ կհարգվեն Հայաստանի Հանրապետության և առհասարակ պետությունների սուվերենության շահերից բխող սկզբունքներ, մեզ համար ընդունելի են:

Այս մասին խորհրդարանական ճեպազրույցների ժամանակ ասել է «Քաղաքացիական պայմանագիր» խմբակցության քարտուղար Արթուր Հովհաննիսյանը:

«Պարոն Միրզոյանի Մոսկվա կատարած այցը հենց դրա մասին է նաև։ Ինչ վերաբերում է նոյեմբերի 9-ի հայտարարության 9-րդ կետի, «Խաղաղության խաչմերուկում» մեր առաջարկներին, ես կարծում եմ՝ դրանք այդքան էլ իրարից չեն տարբերվում, որովհետև նոյեմբերի 9-ի հայտարարության մեջ որևէ խոսք չկա էքստերիտորիալ ինչ-որ տարածքի մասին, ինչպես որ չկա խաղաղության խաչմերուկում, մենք խոսում ենք ճանապարհների ապաշրջափակման, ենթակառուցվածքների վերագործարկման մասին՝ յուրաքանչյուր պետության սուվերենության ներքո»,- ասել է նա և հավելել, որ ՀՀ-ն բանակցում էԱդրբեջանի հետ երկկողմ ֆորմատով:

Նրա խոսքով՝ քննարկումներ են ընթանում Ռուսաստանի գործընկերների հետ իրենց հարթակում, ԵՄ գործընկերների հետ՝ իրենց, Ամերիկայի Միացյալ Նահանգների գործընկերների հետ էլ քննարկումներ կան:

«Տարբեր միջազգային հարթակներում, երբ որ ներկա են ադրբեջանցի պաշտոնյաներ, հանդիպումներ են տեղի ունենում, այսինքն քննարկումները բազմակողմանի են տեղի ունենում, և մենք օգտագործում ենք բոլոր հնարավորությունները խաղաղության օրակարգն առաջ տանելու համար:

Մենք չենք ֆիքսվում կոնկրետ մեկ հարթակի վրա, որովհետև կարծում ենք, որ մեկ հարթակում այդքան էլ արդյունավետ չի եղել մինչ այս եղած քննարկումները, դրա համար էլ հիմա օրինակ կա Հայաստան-Ադրբեջան երկկողմ խոսակցություն և մենք շատ կոնկրետ առաջարկներ ենք ուղարկել Ադրբեջանին, ճանապարհների ապաշրջափակման վերաբերյալ»,- եզրափակել է Հովհաննիսյանը: