Իմ աշխատանքի ընթացքում ընտանիքս շատ է տուժել թե՛ ֆիզիկապես, թե՛ հոգեպես, թե՛ ֆինանսապես․ Վահան Քերոբյան

Էկոնոմիկայի նախկին նախարար Վահան Քերոբյանը պաշտոնից ազատվելուց և կալանքից դուրս գալուց հետո որոշել է նորից բիզնեսով զբաղվել։ Բայց նրա հիմնադրած Menu.am-ը դեռ իր պաշտոնավարման ընթացքում դեմպինգի ենթարկվեց «Յանդեքս» ընկերության կողմից և վաճառվեց հենց «Յանդեքսին»։

Քերոբյանը MediaHub-ի հետ զրույցում ասաց, որ մի քանի ուղղությամբ բիզնես ծրագրեր է մշակում, այս պահին նոր պյոյեկտ է սկսել, որի մասին, սակայն, չցանկացավ այս պահին հրապարակային խոսել։

-Իսկ պետական ապարատ կամ քաղաքականություն վերադառնալու նպատակ ունե՞ք։

-Ոչ, չունեմ։ Ես կարող եմ ասել, որ իմ աշխատանքի ընթացքում իմ ընտանիքը շատ է տուժել թե՛ ֆիզիկապես, թե՛ հոգեպես, թե՛ ֆինանսապես, և ընտանիքով որոշում ենք կայացրել, որ պետք է զբաղվել այդ կորցրածը վերականգնելով, ոչ թե քաղաքականությամբ։ Պետք է թե՛ հոգեպես վերականգնվել, թե՛ նյութապես վերականգնվել, թե՛ ֆիզիկապես վերականգնվել։

-Իսկ Ձեր քաղաքական հայացքները ինչ-որ փոփոխություն կրե՞լ են, թե՞ Դուք շարունակում եք մնալ իշխանությանը կողմնակից, իշխանական հայացքներով կամ իշխանամետ մարդ։

-Ես միշտ եղել եմ հայամետ և էդպիսին էլ մնացել եմ։

-Հայամետը մի քիչ շատ սենտիմենտալ է հնչում այս իրավիճակում։ Իսկ ընդդիմադիր հայացքներ կա՞ն Ձեզ մոտ, թե՞ Դուք այս կառավարությանը քննադատում եք զուտ տնտեսական խնդիրների շուրջ։

-Ես էլ սենտիմենտալ կլինեմ։ Բայց ես նույնիսկ չեմ էլ քննադատում, ես կոչ եմ անում համագործակցել բիզնեսի հետ, որպեսզի ավելի լավ արդյունքներ ստացվեն։