Այսօր հայտնի երգչուհի Սիրուշոյի ծննդյան օրն է
Սիրուշոն ծնվել 1987թ.-ի հունվարի 7-ին։ Սիրուշոն հայտնի հայ երգչուհի, կոմպոզիտոր և բազմաթիվ երգերի հեղինակ է։ Նա հայկական շոու բիզնեսի վառ ներկայացուցիչներից մեկն է։ Այս տաղանդավոր արտիստուհին ծնվել է ստեղծագործողների ընտանիքում։ Հայրը՝ Հրաչյա Հարությունյանը, անվանի դերասան և ռեժիսոր է Հայկական Դրամատիկ Թատրոնում, ՀՀ Ազգային արտիստ։ Մայրը՝ Սյուզան Մարգարյանը, հայտնի և սիրված երգչուհի է, ՀՀ վաստակավոր արտիստ։ Սիրուշոն սկսել է իր կարիերան 7 տարեկան հասակից՝ երգելով Հայաստանի և Կանադայի բեմերում։ 9 տարեկան հասակում նա ստացել է իր առաջին երաժշտական մրցանակը «Լուսաբաց» երգի համար։
Բացի երաժշտական կարիերայից, Սիրուշոն զբաղվում է նաև զարդերի դիզայնով։ 2012թ.ին նա ներկայացրեց իր «ՊռեԳոմեշ» աքսեսուարների շարքը։ Շարքը նոր թրենդների և հին հայկական ավանդույթների համադրություն է։
2000թ.ին լույս տեսավ նրա առաջին ձայնասկավառակը «Սիրուշո» վերնագրով, որին հաջորդեց ՛՛Շերամ՛՛ ձայնասկավառակը։ Նրա երգերում կարելի է լսել սոուլ-ի, R&B-ի, հայկական դուդուկի, զուռնայի և դհոլի համադրությունները։ 2005թ.ին երգչուհին ներկայացրեց հայկական փոփ և ժողովրդական երաժշտությունը աշխարհի ավելի քան 30 երկրներում՝ Կանադա, Շվեդիա, Կիպրոս, Իտալիա, Բելառուս, Միացյալ Թագավորություն, Ուկրաինա, Մալթա, Միացյալ Նահանգներ, Ֆրանսիա, Բելգիա, Հունաստան, Սերբիա, Գերմանիա, Լիբանան, Եգիպտոս, Վրաստան, Ռուսաստան, Հորդանան, Թուրքիա, Սիրիա, Իրան, Լեհաստան և այլն։
2008թ.ին Սիրուշոն ստացավ իր 4-րդ «Լավագույն երգչուհի» տիտղոսը Ազգային Երաժշտական մրցանակաբաշխության շրջանակներում։ Նույն տարվա ընթացքում նա ներկայացրեց Հայաստանը Եվրատեսիլում իր Քելե-Քելե ստեղծագործությամբ։ Երգը գրված էր Սիրուշոյի և կանադահայ կոմպոզիտոր և պրոդյուսեր Հ.Ա.Դեր-Հովագիմյանի կողմից։ Նա զբաղեցրեց 4-րդ հորիզոնականը՝ հավաքելով 199 միավոր։ 2009թ.ի ապրիլին Սիրուշոն ներկայացրեց «Erotas» երգը հունարեն լեզվով։ Երգը պարային էր և միանգամից դարձավ բոլորի կողմից սիրված։ Երգի երաժշտությունը գրել է հայ կոմպոզիտոր Հայկոն, իսկ բառերը՝ Նատալիա Գերմանուն։ Նույն տարվա ընթացքում Սիրուշոն ձայնագրեց մի երգ Եվրատեսիլ 2008-ի մասնակիցներ Բոազ Մաուդայի և Ելենա Թոմասևիչի հետ միասին։ Երգի վերնագիրն է «Time to pray»։ Երգի բառերը գրել է Իսրայելի նախագահ Շիմոն Պերեսը, և այն ներկայացվել է բազմաթիվ երկրներում, ներառյալ Ռուսաստանը և Սերբիան։
2010թ.ին Սիրուշոն ձայնագրեց իր «Հավատում եմ» երգը։ Եվ երգի և երաժշտության հեղինակը հենց ինքն է։ Նույն տարվա փետրվարի վերջին Սիրուշոն հրավիրված էր Մալթա՝ որպես հատուկ հյուր, որտեղ իր այցելության ընթացքում մասնակցեց մի շատ հայտնի հեռուստահաղորդման։ Երգչուհու 4-րդ ձայնասկավառակը վերնագրված է «Հավատում եմ«։ Ձայնասկավառակը ներառում է վերոնշյալ երգերը՝ «Erotas», «Հավատում եմ», «Time to pray» և այլ նոր երգեր, ինչպես նաև երգեր, որոնք նա գրել էր Եվրոտեսիլ 2008-ի հայաստանյան ընտրական փուլի համար։ 2010թ.ին Սիրուշոն գրեց «Судьба Зима» երգը հայտնի ռուս երգիչ Գրիգորի Լեպսի համար։
2011թ.ին ձայնագրվեց «I like it» երգը։ Նույն տարվա դեկտեմբերի 3-ին Սիրուշոն հատուկ հյուր էր Մանկական Եվրատեսիլ երգի մրցույթում, Հայաստանում։ Այստեղ նա ներկայացրեց Քելե-Քելե երգի ռեմիքս տարբերակը։
2012թ.ին ոգշնչվելով Կոմիտասի ՛՛Լոռվա Գութաներգով՛՛՝ նա գրեց և ներկայացրեց ՛՛ՊռեԳոմեշ՛՛ երգը, որը դարձավ շատ հայտնի և երկար ժամանակ զբաղեցրեց հիթ շքերթների առաջին հորիզոնականները։