Տիրան Խաչատրյանին կալանավորելու որոշման դեմ պաշտպանական կողմը բողոք է ներկայացնելու

Զինված ուժերի գլխավոր շտաբի պետի նախկին տեղակալ, գեներալ-լեյտենանտ Տիրան Խաչատրյանին 2 ամսով կալանավորելու դատարանի որոշման դեմ պաշտպանական թիմը պատրաստվում է այսօր կամ վաղը Վերաքննիչ բողոք ներկայացնել։ Այս մասին «Հրապարակ»-ի հետ զրույցում ասաց պաշտպաններից Վարազդատ Հարությունյանը։

Անդրադառնալով մեղադրանքին, նաեւ նրան, որ Խաչատրյանը մեղադրվում է այժմ մի բանում, ինչի վերաբերյալ ժամանակին Նիկոլ Փաշինյանը նրան «Ազգային հերոսի» կոչում է տվել, պաշտպանն ասաց․ «Աբսուրդ է, երբ մարդը դառնում է ընդդիմադիր, երբ Ադրբեջանից պահանջ է հնչում պատերազմական հանցագործներին պատժել․․․ հաշվի առնելով, որ գործն ինքնին աբսուրդ է, իսկ կալանքը էլ ավելի աբսուրդ է, որովհետեև միջին ծանրության հանցագործության համար 4 տարի քննությունից հետո, երբ Տիրան Խաչատրյանը որեւէ կերպ չի խոչընդոտել քննությանն, այլ հակառակը՝ բացառիկ համագործակցային վարք է դրսեւորվել, հարցաքննվել է, երբ պետք է եղել, մասնակցել է տարբեր վարույթների գործողությունների, փորձաքննությանը լրացուցիչ իր կողմից հարցեր է առաջադրել, որպեսզի գործի օբյեկտիվ հանգամանքները պարզվի, էդքանից հետո, հոկտեմբերին էլ, վաղեմության ժամկետներն են լրանում, ինչը Վճռաբեկ դատարանի նախադեպային դիրքորոշման համաձայն՝ բացառում է կալանքը որպես խափանման միջոց ընտրել, եթե անձը չի խախտել արդեն եղած խափանման միջոցի պայմանը, նշանակում է, որ այս ամենի հաշվարկմամբ, բոլոր տեսակի ենթադրությունները՝ քաղաքական, արատքին եւ այլն, կենսունակ են։ Օրենքից չբխող իրավիճակի մեջ ենք գտնվում, ուրեմն ցանկացած այլ ենթադրություն, թե ինչ իրավիճակով է պայմանավորված այս ամեն ինչը, կենսունակ է»։

Հարցին, թե Տիրան Խաչատրյանը առողջական խնդիրներ ունի՞, «Վարդաշեն» ՔԿՀ-ում գտնվող զինվորականն ինչպե՞ս է իրեն զգում, Վարազդատ Հարությունյանն ասաց, որ առողջականի մասով իրավասու չէ հրապարակային որեւէ բան հայտարարել, բայց կան որոշակի խնդիրներ կան․ «Տիրան Խաչատրյանը հաշմանդամության կարգ ունի․ պատերազմի ժամանակ է վիրավորվել երկու ոտքից, այս ամենի հետևենաքով որոշակի խնդիրներ կան, որոնց հետ կապված չունեմ համաձայնություն հրապարակային ներկայացնելու»։

Մեր մեկ այլ հարցին՝ հաշմանդամության կարգ ունենալը դատարանը հաշվի չառա՞վ, փաստաբանն ասաց՝ ոչինչ էլ հաշվի չի առել։

Նշենք, որ տարեսկզբին Տիրան Խաչատրյանը երկու ամսով կալանավորվել էր։ 

Ավելի վաղ, նա ձերբակալվել էր  44-օրյա պատերազմին առնչվող գործով: Տիրան Խաչատրյանը մեղադրվում է ռազմական դրության ընթացքում իր ծառայողական պարտականությունների կատարման նկատմամբ անփույթ վերաբերմունքի համար, որն առաջացրել է ծանր հետևանքներ։ Տիրան Խաչատրյանը մեղադրանքը չի ընդունում։