Հանձնաժողովի հավանությանն են արժանացել Վարչական իրավախախտումների օրենսգրքում առաջարկվող փոփոխությունները

«Հաշվապահական հաշվառման մասին» օրենքի համաձայն՝ բոլոր կազմակերպությունները, բացի փոքր կազմակերպություններից և միկրոկազմակերպություններից, պարտավոր են հրապարակել իրենց տարեկան ֆինանսական հաշվետվությունները: Աուդիտի ենթակա կազմակերպությունները եւս պարտավոր են իրենց տարեկան ֆինանսական հաշվետվությունները հրապարակել միայն աուդիտի ենթարկվելուց հետո, իսկ առանց աուդիտորական եզրակացության, ինչպես նաև ոչ ամբողջական կազմով հրապարակված ֆինանսական հաշվետվությունները համարվում են չհրապարակված: Օրենսդրական պահանջների պահպանման նկատմամբ մշտադիտարկման արդյունքում պարզվել է, որ 275 կազմակերպություն ֆինանսական հաշվետվությունները հրապարակել է սահմանված կարգով և ժամկետներում, 69-ը՝ հրապարակել են խախտմամբ, իսկ 210-ը՝ չեն հրապարակել:

Ըստ ՀՀ ֆինանսների նախարար Վահե Հովհաննիսյանի՝ վերոնշյալ օրենսդրական պահանջները խախտելու համար պատասխանատվության միջոցներ են սահմանված Վարչական իրավախախտումների վերաբերյալ ՀՀ օրենսգրքով:

«Հաշվի առնելով այն հանգամանքը, որ տարեկան հաշվետվությունների աուդիտի միջին արժեքը կազմում է 6 մլն դրամ՝ կարելի է եզրակացնել, որ կազմակերպությունների որոշ շրջանակի համար նախընտրելի է ենթարկվել վարչական պատասխանատվության՝ աուդիտի միջին արժեքի 10 տոկոսի չափով՝ ընդամենը 500 հազար դրամ, քան ապահովել օրենքի պահանջը, այն է՝ ֆինանսական հաշվետվությունները ենթարկել պարտադիր աուդիտի»,- ընդգծել է նախարարը:

Հիմք ընդունելով վերոգրյալը՝ նախագծով առաջարկվում է օրենքով նախատեսված ֆինանսական հաշվետվությունները չհրապարակելու համար սահմանված պատասխանատվության միջոցը դարձնել համադրելի այդ պարտականությունները կատարելու համար պահանջվող աուդիտորական ծառայության արժեքի հետ, մասնավորապես՝ առաջին անգամ՝ 150.000 դրամ կամ աուդիտորական ծառայության միջին արժեքի 2,5 տոկոսի չափով, երկրորդ անգամ՝ 1.500.000 դրամ կամ աուդիտորական ծառայության միջին արժեքի 25 տոկոսի չափով, երրորդ անգամ՝ 3.000.000 դրամ կամ աուդիտորական ծառայության միջին արժեքի 50 տոկոսի չափով, և առաջին, երկրորդ, երրորդ անգամները միասին ընդամենը՝ 4.650.000 դրամ կամ աուդիտորական ծառայության միջին արժեքի 77,5 տոկոսի չափով:

Զեկուցողի խոսքով՝ օրենսգրքով վարչական պատասխանատվության միջոցներ են նախատեսված հրապարակվող ֆինանսական հաշվետվությունները որակավորում չունեցող հաշվապահի կողմից ստորագրելու կամ անստորագիր ներկայացնելու համար, այն դեպքում, երբ «Հաշվապահական հաշվառման մասին» և «Հանրային հատվածի կազմակերպությունների հաշվապահական հաշվառման մասին» ՀՀ օրենքներով սահմանված են պահանջներ որոշակի կազմակերպությունում գլխավոր հաշվապահ աշխատելու համար:

«Վերոնշյալով պայմանավորված՝ նախագծով առաջարկվում է վարչական պատասխանատվություն ենթադրող արարքը սահմանել օրենսդրության պահանջներին համապատասխան, ինչպես նաև վերանայել նախատեսված պատասխանատվության միջոցների չափը՝ առաջին անգամ սահմանելով 100 հազար դրամ՝ գործող 50 հազար դրամի փոխարեն, երկրորդ անգամ՝ 1 մլն դրամ՝ գործող 250 հազար դրամի փոխարեն»,- նշել է Վահե Հովհաննիսյանը:

«Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին» օրենքի նախագիծն առաջին ընթերցմամբ քննարկվել է ֆինանսավարկային և բյուջետային հարցերի մշտական հանձնաժողովի՝ հունվարի 13-ի նիստում և ստացել է դրական եզրակացություն: