Շատ մոտ ապագայում կբացվեն ռեզիդենտ դեսպանություններ Հունգարիայում և Կիպրոսում. Միրզոյան

Արևելքից եթե գանք այս կողմ, Չինաստանի, Հնդկաստանի հետ մենք ունենք օրեցօր զարգացող համագործակցություն, որոնք ընդգրկում են ինչպես ավանդական ոլորտները, այնպես էլ նոր ոլորտներ ենք բացահայտում՝ տնտեսականից մինչև անվտանգային: Այդ մասին ասուլիսի ժամանակ ասաց ՀՀ ԱԳ նախարար Արարատ Միրզոյանը:

«Մերձավոր Արևելքում Սաուդյան Արաբիայի հետ դիվանագիտական հարաբերություններ հաստատելուց հետո առաջին անգամ եղավ ԱԳ նախարարի այց այդ երկիր: Բավականին հետաքրքիր զարգացումներ են նախանշվում, պետք է աշխատել այս ուղղությամբ»,- ասաց նախարարը՝ նշելով, որ Արաբական Միացյալ Էմիրությունների հետ ևս առկա է հետաքրքիր և խոստումնալից երկխոսություն:

«Սիրիայում վերջին իրադարձություններից հետո կամ ընթացքում մենք շատ կարճատև բացակայություն ունեցանք այդ երկրից. սկզբում Հալեպում, այնուհետև Դամասկոսում մեր դեսպանության անձնակազմը ստիպված եղավ մի քանի օր բացակայել Դամասկոսից և, համապատասխանաբար, Հալեպից: Այնուհետև նրանք շարունակեցին իրենց աշխատանքը հյուրընկալ այս պետությունում, հաստատվել են կապեր նոր իշխանության հետ, կշարունակենք աշխատել»,- ասաց Միրզոյանը:

Մերձավոր Արևելքից նախարարը հիշատակեց Պաղեստինի Պետության ճանաչումը ՀՀ-ի կողմից: «Դրան հաջորդեց Նյու Յորքում իմ և Պաղեստինի Պետության վարչապետի կողմից համապատասխան կոմյունիկեի ստորագրումը»,- նշեց Միրզոյանը:

«Կենտրոնական Ասիայում ևս մենք շատ հետաքրքրիր և խոստումնալից գործընկերներ ունենք: Կուզեի առանձնացնել Ղազախստանը: Անցած տարվա ընթացքում, հիշում եք՝ բարձր և բարձրագույն մակարդակի այցեր տեղի ունեցան: Պետք է փաստեմ, որ այդ այցերի ընթացքում եղած քննարկումները ևս բովանդակային առումով շատ հարուստ էին: Ղազախստանը այն պետություններից է, որ ողջունել է «Խաղաղության խաչմերուկը»: Մենք շնորհակալ ենք Ղազախստանին իր պատրաստակամության համար նպաստելու Հայաստան-Ադրբեջան հարաբերությունների կարգավորմանը: Մեկ հանդիպում Ղազախստանը հյուրընկալեց և պատրաստակամություն է հայտնել շարունակել իր այս հյուրընկալությունը»,- ասաց ԱԳ նախարարը:

«Աֆրիկան մեզ համար նոր ու հետաքրքրիր ուղղություն է: Այստեղ մենք ավանդաբար ամենահյուսիսում ունենք ներկայություն, օրինակ՝ Եգիպտոսում: Հիմա մեզ համար բացահայտում ենք Աֆրիկայի մնացած մասը: Դեսպանություն և անձնակազմ ունենք Եթովպիայում, այնտեղից ծածկում ենք այսպես ասած մի շարք աֆրիկյան երկրներ: Ունենք այլ պլաններ և ծրագրեր ևս»,- նշեց նա:

Նախարարը հիշեցրեց, որ Լատինական Ամերիկայում բացվել է ռեզիդենտ դեսպանություն Ուրուգվայում: «Քանի դիվանագիտական հարաբերությունների մասին խոսեցի, ասեմ, որ մենք գրասենյակներ բացեցինք Սերբիայում և Լյուքսեմբերգում: Այս տարի ևս 2025 թվականի համար ունենք պլաններ: Շատ մոտ ապագայում կբացվեն ռեզիդենտ դեսպանություններ Հունգարիայում և Կիպրոսում»,- ասաց Արարատ Միրզոյանը: