на Русском
Հունվարի 11-13-ը Արմավիրի մարզի Փարաքար խոշոր... 
Այց՝ «Երևանի մանկան տուն» ՊՈԱԿ
Արագածոտնի մարզպետն անդրադարձել է թմրանյութ պահելու կասկածանքով իր օգնականին բերման ենթարկելուն
Արագածոտնի մարզպետ Սերգեյ Մովսիսյանն, անդրադառնալով իր օգնական Արմեն Մարկոսյանին թմրանյութ պահելու կասկածանքով բերման ենթարկելուն, վստահեցրել է, որ հանրությունը կստանա բոլոր հարցերի պատասխանները, քանի որ հարցը գտնվում է իրավական դաշտում։
«Արմենպրես»-ի հաղորդմամբ՝ այս մասին Արագածոտնի մարզպետը նշեց Կառավարության նիստից հետո լրագրողների հետ ճեպազրույցի ընթացքում։
«Մանրամասն տեղեկություններ չեմ կարող տալ, որովհետև, կարծում եմ՝ ոչ միայն մասնագիտական, այլև դետալային ինֆորմացիա է պետք, իսկ ես մասնագետ չեմ և չեմ ուզենա ոչ պրոֆեսիոնալ կարծիք հայտնել»,-նշեց մարզպետը:
Սերգեյ Մովսիսյանի կարծիքով՝ հաշվի առնելով այն հանգամանքը, որ հարցը վերաբերում է իր օգնականին՝ իր բոլոր գնահատականները կարող են սուբյեկտիվ դիտվել։
«Ես պաշտոնատար անձ եմ, իմ կարծիքն եմ ասել, մարդկանց հետ շփվելով՝ կարող եմ կարծիք ձևավորել: Իմ խորին համոզմամբ՝ օգնական Արմեն Մարկոսյանը նմանատիպ երևույթների հետ կապ չունի։ Դա իմ սեփական կարծիքն է, բայց ես ո′չ բժիշկ եմ, ո′չ հոգեբան եմ, ես մարդ եմ, որն ունի իր սեփական կարծիքը, որը հնարավոր է նաև սխալ լինի»,- մեջբրում ենք մարզպետի խոսքերը:
Նրա կարծիքով՝ իշխանության մաս լինելը, պատասխանատու պաշտոն զբաղեցնելը կամ օրենսդիր մարմնի ներկայացուցիչ լինելն իր հետ պատասխանատվություն է բերում, և բնական է, որ այն հարցերը, որոնք վերաբերում են պաշտոնյաներին, ավելի շատ են հետաքրքրում հանրությանը: Հետևաբար, պաշտոնատար անձին վերաբերող դրական կամ բացասական երևույթը շատ ավելի մեծ տարածում է ստանում:
Պատասխանելով լրագրողներից մեկի հարցին, թե արդյոք այս միջադեպի թեմայով խոսակցություն ունեցե՞լ է վարչապետ Նիկոլ Փաշինյանի հետ՝ Սերգեյ Մովսիսյանն ասաց.
«Իմ կարծիքով, ինչին որ անհրաժեշտ է, որ վարչապետն արձագանքի՝ արձագանքում է: Ես չէ, որ պիտի պատասխանեմ այդ հարցին»:
Աշտարակի ոստիկանները, դեկտեմբերի 16-ին Ագարակ-Աշտարակ խաչմերուկում «Mercedes»-ի վարորդին թմրանյութ պահելու, օգտագործելու և տարածելու կասկածանքով տեղափոխել են ոստիկանության Աշտարակի բաժին:
Պարզվել էր, որ կասկածանքով ոստիկանություն տեղափոխված Արմեն Մարկոսյանն Արագածոտնի մարզպետ Սերգեյ Մովսիսյանի օգնական-խորհրդականն է:
