Ադրբեջանական ինքնաթիռին հարվածել է ՌԴ ՀՕՊ համակարգը. աղբյուրներ

Բաքվից Գրոզնի թռչող «Ադրբեջանական ավիաուղիների» ինքնաթիռի կործանման պատճառների հետաքննությունը շարունակվում է:

Ադրբեջանական և միջազգային մի շարք լրատվամիջոցներ, հղում անելով Ադրբեջանի կառավարությունում իրենց աղբյուրներին, հայտնում են, որ ինքնաթիռը խոցվել է ռուսական հակաօդային պաշտպանության «Պանցիր-էս» համակարգի միջոցով։ Հրթիռն արձակվել է ինքնաթիռի ուղղությամբ, երբ ռուսական ՀՕՊ ուժերը փորձել են հակազդել ուկրաինական ԱԹՍ-ների հարձակմանը: Հրթիռը պայթել է օդում՝ ինքնաթիռից ոչ հեռու, և վնասել է այն: Վնասված ինքնաթիռին թույլ չեն տվել վայրէջք կատարել Ռուսաստանի օդանավակայաններում՝ չնայած օդաչուների կողմից արտակարգ վայրէջք կատարելու խնդրանքին: Փոխարենը անձնակազմին հանձնարարվել է թռչել դեպի Ղազախստանի Ակտաու քաղաք։

«Հետաքննությանը մասնակցող ադրբեջանական կողմի համար իրավիճակը պարզ է։ Ոչ ոք չի պնդում, որ դա միտումնավոր է արվել։ Սակայն, հաշվի առնելով հաստատված փաստերը, Բաքուն ակնկալում է, որ ռուսական կողմը կընդունի, որ խոցել է ադրբեջանական ինքնաթիռը, պաշտոնական ներողություն կխնդրի ադրբեջանցի ժողովրդից և կանցկացնի լիարժեք հետաքննություն, որի արդյունքում բոլոր մեղավորները կպատժվեն ու պատասխանատվության կենթարկվեն»,- հայտնել է աղբյուրը:

Բաքու-Գրոզնի չվերթն իրականացնող կործանված ինքնաթիռում եղել է 65 ուղևոր և անձնակազմի 5 անդամ։ Ղազախստանի փոխվարչապետը հայտնել է, որ աղետի հետևանքով զոհվել է 38 մարդ: Ադրբեջանի գլխավոր դատախազությունն էլ հայտնել է 32 ուղևորի փրկվելու մասին:

Հատկանշական է, որ ադրբեջանական լրատվամիջոցներն աղետից հետո անդրադարձել էին Հայաստանի վարչապետի ցավակցական ուղերձին՝ տարածելով այն: Սակայն ժամեր անց գրեթե բոլոր լրատվականներից ուղերձի մասին հրապարակումները հեռացվել են: Բացառություն են ընդդիմադիր լրատվամիջոցները: