Բավարիան և Լայպցիգն արձագանքել են Մագդեբուրգում սաուդցու կողմից ամբոխի վրա հարձակմանը

«Բավարիան» և «Լայպցիգը» արձագանքել են Մագդեբուրգում սաուդցու կողմից ամբոխի վրա հարձակմանը։ Armsport-ի փոխանցմամբ՝ Die Welt-ը հաղորդում է, որ Մագդեբուրգի Սուրբ Ծննդյան տոնավաճառում տեղի ունեցած միջադեպի արդյունքում տուժել է 60-ից 80 մարդ։

Կասկածյալը ձերբակալվել է ոստիկանության կողմից։ Պաշտոնական տվյալներով՝ նա Սաուդյան Արաբիայից 50-ամյա բժիշկ է, ով ապրում է Գերմանիայում 2006 թվականից։ Իշխանությունները միջադեպը համարում են ահաբեկչություն։

Հաղորդվում է, որ հարձակման նախօրեին տղամարդը վարձակալել է BMW մակնիշի ավտոմեքենա։

Մեքենայի նստատեղի վրա հայտնաբերվել է ուղեբեռ, սակայն դեռ պարզ չէ, թե արդյոք այնտեղ եղել է պայթուցիկ սարք։ Ոստիկանությունը պարզում է՝ արդյոք վարորդը գործել է միայնակ։

Bild և Volksstimme պարբերականների տվյալներով՝ զոհերի թիվը հասել է առնվազն 11-ի։ Ոստիկանությունը փակել է քաղաքի կենտրոնը և շարունակում է պայթուցիկ նյութերի որոնումները։

«Բավարիան» այս առնչությամբ գրել է իր թվիթերյան էջում. «Սարսափով հետևում ենք Մագդեբուրգից ստացվող նորություններին»։

«Լայպցիգը» նույնպես արձագանքել է. «Մենք շոկի մեջ ենք և խորապես վշտացած Մագդեբուրգից ստացված լուրերից։ Մեր մտքերն ուղղված են զոհերին, նրանց ընկերներին և ընտանիքներին։ Մաղթում ենք բոլոր տուժածներին արագ ապաքինում և շնորհակալություն ենք հայտնում բոլոր փրկարարներին ու առաջին օգնություն ցուցաբերած անձանց»։

«Բավարիայի» գլխավոր տնօրեն Յան-Քրիստիան Դրեզենը հայտնել է, որ «Լայպցիգի» հետ հանդիպումից (5:1) հետո որոշվել է չանցկացնել տոնական միջոցառումներ։

Մանրամասներն ու տեսանյութը՝ սկզբնաղբյուրում։