Կառլո Անչելոտին՝ Ռեալի պատմության ամենատիտղոսակիր մարզիչ

Մադրիդի «Ռեալը» 3։0 հաշվով հաղթել է «Պաչուկային» 2024 թվականի միջմայրցամաքային գավաթի եզրափակիչ խաղում։ Այսպիսով, Կառլո Անչելոտին նվաճել է իր 15-րդ տիտղոսը «Ռեալի» ղեկին և դարձել է ակումբի պատմության ամենատիտղոսակիր մարզիչը։

Իտալացի մասնագետը այս ցուցանիշով շրջանցել է մադրիդցիների լեգենդ Միգել Մունյոսին:

Հիշեցնենք՝ հանդիպման 38-րդ րոպեին Մադրիդի «Ռեալի» հարձակվող Կիլիան Մբապեն Վինիսիուս Ժունիորի փոխանցումից հետո գոլի հեղինակ է դարձել և բացել է հաշիվը։ 53-րդ րոպեին գոլի հեղինակ է դարձել մադրիդցիների հարձակվող Ռոդրիգոն՝ Մբապեի փոխանցումից հետո դառնալով անչափ գեղեցիկ գոլի հեղինակ, իսկ 84-րդ րոպեին 11-մետրանոցից գոլի հեղինակ է դարձել Վինիսիուսը՝ ձևակերպելով հանդիպման վերջնահաշիվը:

Մրցաշարի 1/4 եզրափակչում մեքսիկական ակումբը 3։0 հաշվով հաղթել էր բրազիլական «Բոտաֆոգոյին», իսկ կիսաեզրափակչում ուժեղ էր գտնվել եգիպտական «Ալ-Ահլիից» (0:0, 6:5՝ 11 մետրանոցներ): «Ռեալը» մրցաշարում իր ճանապարհորդությունը սկսել էր անմիջապես եզրափակիչից:

Միջմայրցամաքային գավաթը ՖԻՖԱ-ի կողմից անցկացվող մրցաշար է վեց կոնֆեդերացիաներից յուրաքանչյուրի ակումբային մրցաշարերի հաղթողների և ընդունող երկրի չեմպիոնի միջև, փոխանցում է Armsport-ը։