Պուտինը հայտնել է առաջնագծում բեկումնային փոփոխության մասին

ՌԴ նախագահ Վլադիմիր Պուտինը Պաշտպանության նախարարության կոլեգիայի ընդլայնված նիստի ժամանակ անդրադարձել է առաջնագծում բեկումնային իրավիճակին, ռազմական գործողություններում բազմաթիվ նպատակների հասնելուն և մի շարք այլ հարցերի։ «Արմենպրես»-ի փոխանցմամբ՝ «ՌԻԱ Նովոստի» գործակալությունն առանձնացրել է Պուտինի ելույթից մի քանի ուշագրավ հատված։

Ըստ ՌԴ նախագահի՝ առաջնագծում բեկումնային փոփոխություն է եղել. ռուսական զորքերը մարտական ​​շփման գծում «ամուր պահում են ռազմավարական նախաձեռնությունը»։ Պուտինը նշել է, որ ընթացիկ տարին դարձել է շրջադարձային ռազմական նպատակներին հասնելու առումով. 2024 թվականին Ռուսաստանի վերահսկողության տակ է անցել 189 բնակավայր։

Պուտինի խոսքով՝ այս տարի օրական ավելի քան 1000 մարդ անցնում է պայմանագրային զինծառայության։ 2023 թվականին ՌԴ պաշտպանության նախարարության հետ պայմանագիր է կնքել ավելի քան 300 000 մարդ, այս պահի դրությամբ՝ արդեն ավելի քան 430 000 մարդ։

Կուրսկի մարզի վրա ուկրաինական զորքերի հարձակումը Պուտինը որակել է որպես «անիմաստ արկածախնդրություն»։

ՌԴ նախագահը նաև քննադատել է ԱՄՆ-ին և հավաքական Արևմուտքին Կիևին զենք և գումար տրամադրելու, ՆԱՏՕ-ի ռազմական ծախսերն ավելացնելու և Ռուսաստանի սահմաններին զորքերի խմբավորումներ տեղակայելու համար։

Այս առնչությամբ Ռուսաստանը ձեռնարկում է միջոցներ. մոտ ապագայում  «Օրեշնիկ» համալիրները կմտնեն սերիական արտադրության մեջ։ Պուտինը շեշտել է, որ ռազմավարական միջուկային ուժերը կմնան Ռուսաստանի ինքնիշխանության պաշտպանության հիմնական գործիքներից մեկը, և Մոսկվան կշարունակի աջակցել դրանց ներուժին և զարգացմանը։

Պուտինը նաև ընդգծել է առաջադեմ տեխնոլոգիաները ռազմական ոլորտում ներդնելու, դաշնակիցների հետ ռազմատեխնիկական համագործակցություն հաստատելու, անօդաչու թռչող սարքերի արտադրությունն ավելացնելու անհրաժեշտությունը։