Երևանում մեքենաներ են բախվել, որոնցից մեկը կողաշրջվել է

Այսօր՝ դեկտեմբերի 9-ին, ավտովթար է տեղի ունեցել Երևանում։ Ժամը 21:20-ի սահմաններում Արտաշիսյան փողոցի թիվ 62 շենքի դիմաց բախվել են «Nissan», «ՎԱԶ 2121» և «Reno» մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, ըստ նախնական տեղեկությունների բարեբախտաբար տուժածներ չկան։

Իսկ բախման հետևանքով «Նիվան» կողաշրջվել և հայտնվել է ճանապարհի մեջտեղում։

Դեպքի վայր են ժամանել ՀՀ Ներքին գործերի նախարարության Փրկարար ծառայության Երևանի թիվ 4-րդ հրշեջ-փրկարարական ջոկատից 1 մարտական հաշվարկ։

Վթարի փաստով ՊԾ Երևան քաղաքի գնդի 2-րդ գումարտակում փաստաթղթեր են ձևակերպվում, որտեղ էլ պարզում են վարորդների ինքնությունը։

Ըստ նախնական տեղեկությունների՝ «Նիվան» բախվել է «Nissan»-ին, «Nissan»-ն էլ բախվել է ճանապարհի թույլատրելի հատվածում կայանված «Reno»-ին։

Դեպքի վայրում էլ ինչ-որ քաղաքացիներ՝ հավանաբար վարորդների ընկերները, փորձում էին պարզաբանումներ ստանալ մեկը մյուսից ու բանը չհասավ «տուրուդմփոցի», քանի որ պարեկներն ու օպերատիվորեն դեպքի վայր ժամանած ՀՀ ՆԳՆ Ոստիկանության համայնքային ոստիկանության գլխավոր վարչության Շենգավիթի բաժնի ծառայողները միջամտեցին ու կրքերը հանդարտվեցին։