Գինեկոմաստիա․ պատճառներ և բուժում

Գինեկոմաստիան կրծքագեղձային հյուսվածքի ավելացումն ու կրծքագեղձերի բարորակ (ոչ քաղցկեղածին) մեծացումն է տղաների կամ տղամարդկանց մոտ, որը պայմանավորված է էստրոգեն և տեստոստերոն հորմոնների անհավասարակշռությամբ:

Գինեկոմաստիան կարող է դրևսորվել մեկ կամ երկու կրծքերում, երբեմն՝ անհավասարաչափ:

Կեղծ գինեկոմաստիան վերաբերվում է տղամարդկանց կրծքագեղձերում ճարպային, բայց ոչ գեղձային հյուսվածքի ավելացմանը:

Նորածինների, սեռահասունացող տղաների և տարեց տղամարդկանց մոտ գինեկոմաստիա կարող է զարգանալ հորմոնների մակարդակների բնականոն փոփոխությունների հետևանքով (ֆիզիոլոգիական գինեկոմաստիա), թեև կան նաև այլ պատճառներ, փոխանցում է Aysor.am-ը։

Ընդհանուր առմամբ, գինեկոմաստիան լուրջ խնդիր չէ, սակայն կարող է լինել դժվար հաղթահարելի: Գինեկոմաստիա ունեցող տղամարդիկ և տղաները երբեմն նշում են կրծագեղձերի ցավ և կարող են ամաչել իրենց արտաքինից:

Գինեկոմաստիան կարող է ինքնուրույն անցնել, բարդացած դեպքերում կարող են օգնել դեղորայքը կամ վիրահատությունը :

Գինեկոմաստիա ունեցող չափահաս տղամարդկանց մեծ մասը որևէ ախտանիշ չի նշում:

Այս վիճակի գանգատներն ու ախտանիշները կարող են ներառել՝

ցավ՝ հատկապես դեռահասների մոտ,

կրծքագեղձի հյուսվածքի այտուցվածություն,

կրծքագեղձի ցավոտություն,

հագուստին քսվելիս պտուկների զգայունություն:

Կարող են մեծանալ ինչպես մեկ այնպես էլ երկու կրծքագեղձերը, սակայն գինեկոմաստիան տարբերվում է գիրությանն ուղեկցող կրծքագեղձերի մեծացումից, որի պատճառը ճարպային, այլ ոչ թե գեղձային հյուսվածքի գերաճն ու կուտակումն է:

Մաշկի փոսությունը և պտուկի ներքաշումը չեն համարվում գինեկոմաստիային բնորոշ նշաններ. դրանք ավելի շուտ տղամարդկանց մոտ կրծքագեղձի քաղցկեղի ախտանիշներ են: Պտուկից կաթնային արտադրությունը նույնպես չի համարվում գինեկոմաստիային բնորոշ նշան, սակայն կարող է առաջանալ, եթե գինեկոմաստիա զարգացել է պրոլակտին արտադրող ուռուցքի պատճառով։

Գինեկոմաստիայի այլ հնարավոր նշաններից են նաև կրծքի հյուսվածքի անահմաչափությունը և հարպտկային շրջանի տրամագծի մեծացումը։

Գինեկոմաստիա ունեցող տղամարդիկ կարող են լինել անհանգիստ կամ սթրեսի ենթարկված՝ հնարավոր կրծքագեղձի քաղցկեղի կասկածի կամ կրծքի կանացի տիպի փոփոխության պատճառով:

Այցելեք ձեր բժշկին, եթե ունեք՝

այտուցվածություն,

ցավ կամ դիպչելիս ցավոտություն,

մեկ կամ երկու կրծքերից արտադրություն:

Գինեկոմաստիայի ռիսկը կարող են բարձրացնել հետևյալ գործոնները՝

դեռահասություն,

մեծ տարիք,

մարզական ցուցանիշները բարելավելու համար անաբոլիկ ստերոիդների օգտագործում,

որոշակի առողջական խնդիրներ, ինչպիսիք են լյարդային և երիկամային հիվանդությունները, վահանաձև գեղձի խանգարումները, հորմոն-ակտիվ ուռուցքները և Կլայնֆելտերի համախտանիշը: