Նեյտրոպենիան՝ արյան սպիտակ բջիջների նվազման պատճառ

Նեյտրոպենիան առաջանում է այն դեպքում, երբ արյան սպիտակ բջիջների (լեյկոցիտների) տեսակներից մեկի՝ նեյտրոֆիլների քանակը նվազում է:

Արյան սպիտակ բջիջները օգնում են վարակների դեմ պայքարին, ուստի նեյտրոպենիայով մարդիկ դառնում են վարակների նկատմամբ խոցելի:

Նեյտրոպենիան ունի բազմաթիվ պատճառներ և կարող է լինել ինչպես բնածին, այնպես էլ երկրորդային՝ որպես մեկ այլ հիվանդության կամ վիճակի հետևանք, ինչպիսին է քաղցկեղի դեմ բուժումը, փոխանցում է Aysor.am-ը։

Նեյտրոպենիան ախտորոշվում է արյան թեստով: Բուժումը կախված է նեյտրոպենիայի տեսակից և ծանրության աստիճանից: Նեյտրոպենիայի առկայության դեպքում, պետք է մշտապես պաշտպանվել վարակներից:

Որոշ մարդկանց մոտ կարող են զարգանալ տարբեր տեղակայման բակտերիալ վարակներ՝ մաշկի, բերանի շրջանի, հարքթային խոռոչների, ներքին օրգանների (օրինակ՝ թոքեր): Կրկնվող վարակները նույնպես կարող են լինել նեյտրոպենիայի նշաններից մեկը:

Ախտանիշները կարող են ներառել՝

ջերմություն (տենդային նեյտրոպենիա),

հոգնածություն,

ցավոտ կոկորդ (ըմպանաբորբ),

այտուցված ավշային հանգույցներ,

բերանում կամ հետանցքի շուրջը խոցերի առաջացում,

վարակված շրջանի ցավ, այտուցվածություն և ցան,

փորլուծություն,

միզելիս այրոցի զգացողություն կամ այլ միզային ախտանիշներ (հրատապ միզելու ցանկություն, հաճախամիզություն և այլն):

Նեյտրոպենիան կարող է լինել՝

սուր, երբ ի հայտ է գալիս հանկարծակի և, սովորաբար, արագորեն էլ անհետանում է,

քրոնիկ, երբ շարունակվում է բավականին երկար ժամանակ,

ցիկլային, երբ պարբերաբար հայտնվում և անհետանում է:

Տենդային նեյտրոպենիան սովորաբար հանդես է գալիս որպես քաղցկեղի բուժման բարդություն և դրսևորվում է ջերմության 38° C և ավելի բարձրացմամբ և վարակներին բնորոշ նշաններով, ինչպիսիք են դողը, սարսուռը և ինքնազգացողության վատացումը։ Տենդային նեյտրոպենիան համարվում է կյանքին սպառնացող վիճակ և պահանջում է անհետաձգելի բժշկական օգնություն: