Հաշիմոտոյի հիվանդություն. վահանաձև գեղձի վրա ազդող աուտոիմուն խանգարում

Հաշիմոտոյի հիվանդությունը վահանաձև գեղձի վրա ազդող աուտոիմուն խանգարում է:

Աուտոիմուն խանգարումը հիվանդություն է, որն առաջանում է առողջ հյուսվածքների վրա իմունային համակարգի գրոհի և վնասման հետևանքով: Հաշիմոտոյի հիվանդության ժամանակ իմունային համակարգի բջիջները հանգեցնում են վահանաձև գեղձի հորմոն արտադրող բջիջների մահվան: Հիվանդությունը սովորաբար հանգեցնում է հորմոնների արտադրության նվազմանը (հիպոթիրեոզ): Ախտահարված վահանաձև գեղձը կարող է զգալիորեն մեծանալ, որը կոչվում է խպիպ (զոբ) կամ, հակառակը, գեղձը կարող է փոքրանալ: Ոչ հազվադեպ, վահանաձև գեղձի մեջ կարող են առաջանալ հանգույցներ կամ պնդացած շրջաններ, փոխանցում է Aysor.am-ը։

Թեև ցանկացած մարդ կարող է ունենալ Հաշիմոտոյի հիվանդություն, այն առավել տարածված է միջին տարիքի կանանց շրջանում: Առաջնային բուժումը վահանաձև գեղձի հորմոնների փոխարինումն է:

Հաշիմոտոյի հիվանդությունը զարգանում է դանդաղորեն՝ տարիների ընթացքում։

Հիվանդը կարող է չնկատել հիվանդության գանգատները կամ ախտանիշները: Ի վերջո, վահանաձև գեղձի հորմոնների արտադրության նվազումը (հիպոթիրեոզ) կարող է հանգեցնել հետևյալ ախտանիշներից որևէ մեկին՝

հոգնածություն և դանդաղկոտություն,

ցրտի և սառը ջերմաստիճանի անտանելիություն,

փորկապություն,

գունատ և չոր մաշկ,

փքված դեմք,

փխրունացած եղունգներ,

մազաթափություն և գլխամաշկի մազերի նոսրացում,

լեզվի մեծացում,

անբացատրելի քաշի ավելացում,

մկանացավեր, լարվածություն և կարկամություն,

հոդացավեր և կարկամություն,

մկանային թուլություն,

առատ կամ երկարաձգված դաշտանային արյունահոսություն,

դեպրեսիա,

հիշողության վատացում:

Հաշիմոտոյի հիվանդության գանգատներն ու ախտանիշները շատ տարբեր են: Դրանք կարող են առաջանալ մի շարք խանգարումների հետևանքով, կարևոր է հնարավորինս շուտ դիմել բժշի՝ ժամանակին և ճշգրիտ ախտորոշման համար: