Աշնանային դեպրեսիվ համախտանիշ. ինչպե՞ս հաղթահարել

Խոր աշնանը շատերի մոտ առաջանում է այսպես կոչված «աշնանային դեպրեսիա»։ Այս վիճակն, ընդհանուր առմամբ, վտանգավոր չէ, բայց դրա դրսևորումները տհաճ են։ Մարդը կարող է դառնալ անտարբեր, անհանգիստ, պասիվ, ունենալ տրամադրության հաճախակի անկումներ, գրում է Aysor.am-ը։

Սեզոնային անհանգիստ վիճակն, իրականում, դեպրեսիա չէ և առաջանում է զուտ արտաքին պատճառներով.

աշնանը կենսապայմանները կտրուկ փոխվում են,

ցերեկը կարճանում է, դրա պատճառով օրգանիզմում նվազում է կարևոր հորմոնների՝ սերոտոնինի և մելատոնինի արտադրությունը,

սննդակարգում քչանում են թարմ հատապտուղները, բանջարեղենը, մրգերը, որոնք առատորեն հասանելի էին ամռանը,

եղանակը դառնում է ցուրտ, անձրևոտ և ամպամած,

պատուհանից դուրս տեսարանը փոխվում է, բնությունը դառնում է ավելի մռայլ և այլն:

Այս բոլոր գործոնները բացասաբար են ազդում մարդու տրամադրության և ընդհանուր վիճակի վրա, հետևաբար՝ դեպրեսիայի ախտանիշների վրա:

Խոսքը ոչ թե դեպրեսիայի՝ որպես հոգեկան խանգարման, այլ սեզոնային դեպրեսիվ համախտանիշի մասին է։ Սա անվնաս «աշնանային վիճակ» է, պարզ, բայց կարևոր միջոցները կօգնեն ազատվել դրանից։

Ապահովեք պայծառ արհեստական ​​լուսավորություն տանը և աշխատավայրում: Երեկոյան թույլ լույսը նպաստում է քնկոտության ու ապատիայի առաջացմանը։

Հնարավորության դեպքում ճաշի ժամին և հանգստյան օրերին գնացեք զբոսանքի, որպեսզի չզրկեք ձեզ բնական արևի լույսից:

Հետևեք սննդակարգին. իմունիտետը պահպանելու համար սննդակարգում ներառեք ֆերմենտացված կաթնամթերք, մրգեր, բուսական թեյեր և առողջարար թուրմեր:

Պարանոցի բուժական մերսման կուրս անցեք։ Այն կարող է շատ օգտակար լինել «աշնանային դեպրեսիայի» դեպքում, քանի որ բարելավում է արյան մատակարարումն ուղեղ, թեթևացնում է մկանային լարվածությունը և այլ տհաճ ախտանիշներ։ Այսպիսի մերսումը նախատեսված է սթրեսի, քնի խանգարումների և գլխացավերի դեպքում։ Այն բարենպաստ ազդեցություն է ունենում ինչպես մօրգանիզմի, այնպես էլ տրամադրության վրա։

Բավականաչափ քնեք և հետևեք առօրյային: Աշնանը հատկապես կարևոր է քնել օրական առնվազն 8 ժամ, որպեսզի սահմանափակ ուժի պաշարը վերականգնվելու ժամանակ ունենա։

Զբաղվեք սպորտով և ընտրեք ակտիվ հանգիստ։ Վազք, բացօթյա խաղեր, լող, յոգա սկսնակների համար՝ ցանկացած ֆիզիկական ակտիվություն կօգնի հաղթահարել սթրեսը:

Ժամանակ գտեք հոբբիների համար: Փորձեք օրական գոնե 30 րոպե գտնել հաճելի ստեղծագործական գործունեության համար՝ նկարչություն, ձեռքի աշխատանք և այլն։

Մեղմ դեպրեսիան հնարավոր է ինքնուրույն հաղթահարել, սակայն բարդ դեպքերում, եթե ​​ապատիան և դեպրեսիվ տրամադրությունը պահպանվում են մի քանի շաբաթ և շատ արտահայտված են, անհրաժեշտ է դիմել մասնագետի։

Երբեմն անքնությունը, գլխացավն ու դեպրեսիան կարող են լինել նյարդային համակարգի հիվանդությունների նախանշաններ, որոնք բուժում է նյարդաբանը։