1 զոհ, 4 վիրավոր․ խոշոր ու ողբերգական ավտովթար՝ Պեմզաշեն-Արթիկ ճանապարհին

Նոյեմբերի 17-ին, խոշոր ու ողբերգական ավտովթար է տեղի ունեցել Շիրակի մարզում: Ժամը 22:15-ի սահմաններում Պեմզաշեն-Արթիկ ավտոճանապարհի 3-րդ կմ հատվածում բախվել են Շիրակի մարզի բնակիչներ 51-ամյա Արտյոմ Գասպարյանի վարած «ԳԱԶ 3110» մակնիշի և 17-ամյա Ալեքսան Հ.-ի վարած «Opel» մակնիշի ավտոմեքենաները:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Ալեքսան Հ.-ն տեղում մահացել է, իսկ Ա. Գասպարյանը, վերջինիսի ուղևորներ, Շիրակի մարզի բնակիչներ 41-ամյա Զոհրաբ Սարգսյանը, 40-ամյա Ռուբեն Շամոյանը, և «Opel»-ի ուղևոր, Շիրակի մարզի բնակիչ 18-ամյա Սարգիս Նազարեթյանը մարմնական վնասվածքներով տեղափոխվել են մի մասը՝ Արթիկի, մյուս մասը՝ Գյումրու բժշկական կենտրոններ:

Հրշեջ-փրկարարները հոսանքազրկել են ավտոմեքենաները, ավտոմեքեաներից դուրս են բերել և պատգարակով շտապօգնության ավտոմեքենաներին են մոտեցրել վարորդներին և ուղևորներին:  

Բախման հետևանքով «Opel»-ը մասնատվել է, մի մասը՝ գլխիվայր շրջվել ու հայտնվել է ճանապարհի երթևեկելի գոտում, իսկ մի մասն էլ հայտնաբերվել է երթ գոտուց դուրս՝ դաշտամիջյան հատվածում:  

Վթարի փաստով Արթիկի և Անիի քննչական բաժնում նախաձեռնվել է քրեական վարույթ:

Ավտոմեքենաները քննիչի հանձնարարականով՝ տեղափոխվել են ոստիկանության Արթիկի բաժնի պահպանվող հատուկ տարածք:

Վիրավորներից 2-ի վիճակը գնահատվում է ծայրահեղ ծանր: