Համբերությունը սպառվեց․ Ռոման հեռացրեց գլխավոր մարզչին

Օրացույցի վրա դեռ նոյեմբերի 10-ն է, իսկ Հռոմի «Ռոման» ընթացիկ մրցաշրջանում հեռացնում է երկրորդ գլխավոր մարզչին։

Այսօր «Ռոման» պաշտոնապես հայտարարել է թիմի գլխավոր մարզիչ Իվան Յուրիչին պաշտոնանկ անելու մասին։

Հռոմեական ակումբի ղեկավարության համբերությունը վերջնականորեն սպառվեց «Բոլոնիայից» (2:3) կրած պարտությունից հետո։

Բացի այդ, «Ռոման» ոչ-ոքի էր խաղացել «Յունիոնի» հետ Եվրոպա լիգայում, ինչպես նաև պարտվել «Վերոնային» նույն 2:3 հաշվով։

«Գայլերը» Սերիա A-ի ընթացիկ մրցաշրջանում 13 միավորով զբաղեցնում են աղյուսակի 12-րդ հորիզոնականը։

Յուրիչը գլխավորել էր «Ռոման» սեպտեմբերի 18-ին։ Մինչ այդ գլխավոր մարզչի պաշտոնը զբաղեցնում էր ակումբի լեգենդ Դանիելե Դե Ռոսին, որի գլխավորությամբ հռոմեացիները մրցաշրջանի վատ մեկնարկ ունեցան։

Armsport-ի փոխանցմամբ՝ ինչպես հաղորդում է Gazzetta dello Sport-ը, Յուրիչի փոխարեն «Ռոման» կգլխավորի Ռոբերտո Մանչինին, որը վերջերս էր հեռացվել Սաուդյան Արաբիայի հավաքականի գլխավոր մարզչի պաշտոնից։