Ի՞նչ անել գլխացավի դեպքում

Լարվածության գլխացավը սովորաբար հայտնվում է ակնթարթորեն, տեսակով մեղմ և տանելի ցավ է:

Սա գլխացավի ամենատարածված տեսակն է, որի պատճառները, սակայն, բավարար պարզաբանված չեն: Լարվածության գլխացավը անվանում են նաև սթրեսոգեն կամ նևրոտիկ գլխացավ անվամբ։

Լարվածության գլխացավերն ունեն բուժման տարատեսակ մեթոդներ, փոխանցում է Aysor.am-ը։

Այս տեսակի գլխացավի կառավարումը հաճախ իրենից ներակայցնում է առողջ սովորույթների կիրառման, արդյունավետ, ոչ դեղորայքային բուժում գտնելու և դեղերի պատշաճ օգտագործման միջև լավագույն հավասարակշռության ապահովումը:

Լարվածության գլխացավի նշաններն ու ախտանիշները ներառում են՝

բութ գլխացավ,

ճակատով մեկ կամ քունքերի և գլխի հետևի մասում ձգվածության կամ ճնշման զգացում,

գլխամաշկի, պարանոցի և ուսի մկանների գերզգայունություն կամ ցավոտություն:

Լարվածության տիպի գլխացավերը բաժանվում են երկու հիմնական դասի՝ դրվագային և քրոնիկ։

Դրվագային լարվածության գլխացավերը կարող են տևել 30 րոպեից մինչև մեկ շաբաթ: Հաճախակի դրվագային լարվածության գլխացավերը կրկնվում են ամսական մինչև 15 օր՝ առնվազն երեք ամսվա ընթացքում:

Հաճախակի կրկնվող դրվագային լարվածության գլխացավերը հեշտությամբ դառնում են քրոնիկ:

Պետք է նշել նաև, որ է լարվածության գլխացավերը կարելի է հեշտությամբ շփոթել միգրենի հետ։

Ավելին, եթե առկա են հաճախակի դրվագային լարվածության գլխացավեր, կարող է առաջանալ նաև միգրեն:

Ի տարբերություն միգրենի որոշ ձևերի, լարվածության գլխացավերը սովորաբար չեն ուղեկցվում տեսողության խանգարումներով, սրտխառնոցով կամ փսխմամբ:

Թեև ֆիզիկական ակտիվությունը սովորաբար ուժեղացնում է միգրենային ցավը, այն չի վատթարացնում լարվածության գլխացավը:

Լույսի կամ ձայնի նկատմամբ զգայունության բարձրացում կարող է առաջանալ նաև լարվածության գլխացավի դեպքում, սակայն այս ախտանիշը տարածված չէ:

Եթե լարվածության գլխացավերը խաթարում են կյանքի բնականոն ընթացքը կամ շաբաթական երկու անգամից ավելի գլխացավի դեմ դեղեր ընդունելու կարիք է զգացվում, ապա անպայման պետք է դիմել բժշկի:

Երբեմն գլխացավերը կարող են վկայել լուրջ հիվանդության մասին, ինչպիսին է գլխուղեղի ուռուցքը կամ թուլացած արյունատար անոթի պատռվածքը (անևրիզմա):

Ներքոնշյալ գանգատներից կամ ախտանիշներից որևէ մեկը ունենալու դեպքում, անհապաղ դիմեք բուժօգնության՝

կտրուկ, ուժեղ գլխացավեր,

գլխացավ, որն ուղեկցվում է բարձր ջերմությամբ, պարանոցի կարկամվածությամբ և ձգվածությամբ, գիտակցության շփոթվածությամբ, ցնցումներով, երկտեսությամբ, թուլությամբ, թմրածությամբ կամ խոսքի դժվարացմամբ,

երբ գլխացավն առաջացել է գլխի վնասվածքից հետո, հատկապես, եթե ցավը գնալով սաստկանում է: