Ցանկացած երկիր ձգտում է մի քիչ ավելի շատ վերցնել. դիմացինը կամ տալիս է, կամ՝ ոչ. Սուքիասյանը՝ Սյունիքով ճանապարհի մասին

Իհարկե, մենք պետք է Ռուսաստանի հետ շարունակենք ու խորացնենք տնտեսական հարաբերությունները. աշխարհի ցանկացած պետության հետ Հայաստանը պետք է դիվերսիֆիկացված տնտեսական հարաբերություններ ունենա: Այս մասին NEWS.am-ի հետ զրույցում նշեց ԱԺ «Քաղաքացիական պյմանագիր» խմբակցության պատգամավոր, գործարար Խաչատուր Սուքիասյանը:

«Հայաստանի տարածքով անցնող ցանկացած ճանապարհ մեր ինքնիշխանության շրջանակներում է եւ մեր խնդիրն է: Իհարկե, որպեսզի տարածաշրջանի այլ պետություններ եւս վստահեն, միգուցե ոչ թե վերահսկողություն, այլ որոշակի միոնիտորինգ իրականացվի: Այդ հարցերը ինչ-որ աստիճանով տեխնիկական են, ինչ-որ աստիճանով քաղաքական են, ինչ-որ աստիճանով պետական են: Կարծում եմ՝ պետությունների միջեւ ոսկե միջինը կգտնվի»,-ասաց նա:

Դիտարկմանը, որ Մոսկվան պնդում է, որ Սյունիքով անցնող ճանապարհն ինքը պետք է վերհսկի, Խաչատուր Սուքիասյանն ասաց. «Ցանկացած երկիր ունի իր շահը, եւ ուզենալու է դա առաջ տանել: Ցանկացած պետություն ձգտում է մի քիչ ավելի շատ վերցնել: Դիմացինը կամ տալիս է, կամ չի տալիս, կամ որոշ բաներ զիջում է: Հիմա մենք նույնպես որպես պետություն այլ երկրների հետ բանակցելիս ուզում ենք, որ Հայաստանի համար առավել լավ լինի: Այստեղ եւս ոսկե միջինը կգտնվի:

Ես կարծում եմ՝ մենք շատ ենք կենտրոնանում, բարդացնում այդ փոխհարաբերություններն ավելի սրում: Դրա կարիքը չկա, միջազգային հանրություն կա, նորմատիվներ կան, միջազգային հարաբերություններ կան, երկրների միջեւ ստորագրված համաձայնագրեր կան: Դրանց արդյունքում կորոշվի եւ ես կարծում եմ, որ ճիշտ կլինի, որ Հայաստանը բաց քաղաքականություն վարի:

Մենք պետք է բոլոր ժողովուրդներին հարգենք, առավել եւս, որ տարածաշրջանում հայկական գենը բարձր տոկոս ունի, բավականին տարածված է: Պետք է գիտակցենք, որ մենք էդ մարդկանց հետ դարերով շփվել ենք, մշակույթներն իրար նման նե, նույնիսկ լեզվական ու արտաքին տեսքի, սննդի նմանություն կա: Հայերը շատ ճկուն են եւ մեզ էլ շատ հարգում են»: