Գեղարքունիքի մարզի պարեկները ապօրինի թմրաշրջանառության դեպքեր են բացահայտել

Գեղարքունիքի մարզի պարեկները հոկտեմբերի 9-ին Երևան-Սևան-Իջևան ավտոճանապարհին ծառայություն իրականացնելիս սահմանված արագությունը գերազանցելու համար կանգնեցրել են Կոտայքի մարզի 33-ամյա բնակչի վարած «ՎԱԶ-2115» մակնիշի ավտոմեքենան:

Պարեկները մեքենայի սրահի ակնհայտ տեսանելի հատվածում նկատել են կաթուցիչ և թղթով փաթեթավորված զանգված: 33-ամյա վարորդը թմրանյութ պահելու հիմնավոր կասկածանքով ներկայացվել է ոստիկանության Սևանի բաժին, իսկ ավտոմեքենան տեղափոխվել է հատուկ պահպանվող տարածք:

Հոկտեմբերի 10-ին Վարդենիս համայնքում ծառայություն իրականացնելիս պարեկները ստուգման նպատակով կանգնեցրել են «Մերսեդես» մակնիշի մի ավտոմեքենա: 23-ամյա վարորդը իրավապահներին է ներկայացրել կաթուցիչ: Վարորդն ու ավտոմեքենան տեղափոխվել են ոստիկանության Վարդենիսի բաժին, որտեղ երիտասարդը հայտնել է, որ կաթուցիչով թմրանյութ է օգտագործել:

Ջրային պարեկները հոկտեմբերի 12-ին Երևան-Սևան-Իջևան ավտոճանապարհին ծառայություն իրականացնելիս ստուգման նպատակով կանգնեցրել են Երևանի բնակիչ 34-ամյա տղամարդու վարած «ԲՄՎ» մակնիշի մեքենան: Վարորդը պարեկներին ներկայացրել է ապակյա գլանակ և դեղնականաչավուն զանգվածով 2 փաթեթ: Հայտնել է, որ ներկայացվածը թմրանյութ է՝ անձնական օգտագործման համար:

Գեղարքունիքի պարեկների հաջորդ բացահայտումը հոկտեմբերի 14-ին էր: Երևան-Սևան-Իջևան ավտոճանապարհին նրանք ստուգման նպատակով կանգնեցրել են Երևանի բնակիչ 22-ամյա երիտասարդի վարած «ՎԱԶ-2170» մակնիշի ավտոմեքենան: 21-ամյա ուղևորը իրավապահներին է ներկայացրել կիսամոխրացած զանգվածով կաթուցիչ: Հայտնել է, որ զանգվածը թմրանյութ է՝ անձնական օգտագործման համար:

Բոլոր դեպքերով կազմված փաստաթղթերն ուղարկվել են նախաքննական մարմին։