«Տիգրանաշենի դպրոցի տնօրենը թույլ չտվեց մտնել դպրոց, տնտեսվարն էլ ոտքով հարվածեց». ահազանգում է աշակերտի ծնողը

Արարատի մարզի Տիգրանաշեն գյուղի բնակչուհին ահազանգում է՝ օրերս գյուղի դպրոցի տնօրենն իրեն թույլ չի տվել մտել դպրոց, որտեղ սովորում են իր երեխաները, իսկ տնտեսվարը ոտքով հարվածել է։ NEWS.am-ի հետ զրույցում Աիդա Կարապետյանը պատմում է, որ դպրոցի ուսուցիչների և տնօրենի հետ հարաբերությունները միշտ էլ լարված են եղել, ասում է՝ իր երեխաներին մշտապես հոգեբանական ճնշման են ենթարկել գնահատականների պատճառով։ Վերջերս էլ, Տիգրանաշենի բնակչուհու խոսքով, գրականության ուսուցչուհին դասը չսովորելու համար ապտակել էր 5-րդ դասարանի աշակերտներից մեկին։ Աիդա Կարապետյանն ավելի ուշ տեսանկարահանել էր աշակերտի հետ զրույցը, որտեղ տղան պատմում էր տեղի ունեցածի մասին, և դեպքի մասին հայտնել իրավապահներին։ Միջադեպից հետո դպրոցի անձնակազմի հետ լարվածությունն ավելի է սրվել։

«Ծնողը երբեք չի վիճում գնահատականի համար, ծնողը վիճում է սխալների, երեխայի նկատմամբ ցուցաբերված ոչ ճիշտ մոտեցման համար։ Գնացի դպրոց, տնօրենի հետ զրուցելու, ասաց, որ չի ուզում ինձ հետ խոսել։ Նշեցի, որ երեխաների համար հաց եմ բերել, և պետք է փոխանցեմ։ Տնօրենն իրեն հարիր ժարգոնով ասաց՝ սպասի՛ր, զանգը կտա, դուրս կգան։ Նրան թեթև հրելով ներս մտա դպրոց»,–պատմեց Տիգրանաշենի բնակչուհին։

Նա, իր խոսքով, դպրոց մտնելուց հետո նկատել է, թե ինչպես է տնտեսվարը մտնում ուսուցչանոց և դուրս գալիս, ենթադրում է, թե այդ ժամանակ էլ անջատել են միջանցքի տեսախցիկները։ Ապա տնտեսվարը մոտեցել է ու սկսել հեռախոսով տեսանկարահանել տեղի ունեցողը։

«Այդ պահին ուզում էի վերցնել հեռախոսը ձեռքից, բարձրացավ աթոռին ու ոտքով հարվածեց որովայնիս հատվածին։ Սկզբից չէի հասկանում, հետո զգացի՝ ծակոցներ կան պորտիս շրջանում»,–պատմեց Աիդա Կարապետյանը՝ նշելով, որ դրանից հետո էլ տնօրենը փորձել է քաշել իր մազերից և դուրս հանել դպրոցից, ինչին ի պատասխան՝ ինքը ապտակել է տնօրենին։

Տիգրանաշեն գյուղի հիմնական դպրոցի տնօրեն Նելլի Մելքոնյանը NEWS.am-ի հետ զրույցում հրաժարվեց մեկնաբանել միջադեպը։

Քննչական կոմիտեից հայտնեցին, որ Տիգրանաշենի դպրոցում աշակերտին ապտակելու դեպքով վարույթ է նախաձեռնվել ՀՀ քրեական օրենսգրքի 195-րդ հոդվածի 1-ին մասով՝ ֆիզիկական ներգործության հատկանիշներով։ Կատարվել են հարցաքննություններ, նախաքննությունը շարունակվում է։ Քրեական հետապնդում չկա հարուցված որևէ անձի նկատմամբ։

Քննչական կոմիտեից հայտնեցին նաև, որ կա ևս մեկ վարույթ՝ նախաձեռնված դպրոցում ևս մեկ միջադեպի առնչությամբ։

«Երկու տարբեր հաղորդումներ ենք ստացել՝ մի դեպքում քաղաքացուն հարվածելու, մյուս դեպքում՝ նույն քաղաքացու կողմից դպրոցի ներկայացուցչին հարվածելու վերաբերյալ։ Նախաձեռնվել է քրեական վարույթ ՀՀ քրեական օրենսգրքի 297–րդ հոդվածի՝ խուլիգանության հատկանիշներով։ Նախաքննությամբ պարզվում են հանգամանքները»,–հայտնեցին ՔԿ–ից։