Քաղաքական պաշտոն չեմ զբաղեցնի, ՀԷՑ-ից ես էլ էի դժգոհ, իմ վրա ոչ մի ճնշում էլ չի եղել․ Գարեգին Բաղրամյան

Մի քանի օր առաջ անակնկալ կերպով հրաժարական տվեց Հանրային ծառայությունները կարգավորող հանձնաժողովի նախագահ Գարեգին Բաղրամյանը։

MediaHub-ը այս թեմայով զրուցել է ՀԾԿՀ արդեն նախկին նախագահի հետ․

-Պարոն Բաղրամյան, ի վերջո, ո՞րն էր Ձեր հրաժարականի պատճառը։

-Չեմ ուզում հիմա մեկնաբանել, կարող է գա ժամանակ՝ խոսենք, հիմա չեմ ուզում։

-Ինչ-որ ճնշումնե՞ր են եղել Ձեր նկատմամբ։

-Չէ, ոչ մի ճնշում էլ չի եղել, ես գրել դուրս եմ եկել։

-Ինչո՞ւ։ Նոր էիք վերընտրվել խորհրդարանի կողմից այդ պաշտոնում։ Կարո՞ղ է ՀԷՑ-ի հետ կապված խնդիրն ու լսումներն էին պատճառը, որ որոշեցիք հեռանալ։

-Դե, որոշ մարդիկ կարող է էդպես մտածեն, բայց ես, համենայնդեպս, իմ գործն եմ արել, հիմա դա արդեն ժամանակը ցույց կտա, որ ես իմ հիմնարկի իրավասություններից ելնելով՝ իմ գործն արել եմ․ թե ով, ինչի հետ է կապում, դա արդեն իրենց գործն է։

-Իսկ ՀԷՑ-ի լավ կամ վատ աշխատանքը, արդյունավետությունը Ձեր հիմնարկի աշխաատանքի հետ կապ ունե՞ր։

-Այնքանով, ինչքանով որ պիտի ՀԷՑ-ը հետևի մեր կանոններին, իսկ այդ կանոններին չհետևելու արդյունքում էլ մեր արձագանքը միշտ եղել է և՛ վարչական վարույթների տեսքով, և՛ կոնկրետ տուգանքների տեսքով, նաև սպառողներին փոխհատուցման տեսքով։ Վերջին ժամանակների էդ խնդիրների հետ կապված էլ էդ տուգանքների որոշակի խստացումներ էինք արել։

-Ասում են՝ այս ամենը հատուկ կազմակերպված էր․ Կոնջորյան Հայկը հրավիրեց այդ լսումները, ՔՊ-ականներն էլ եկան ու հարձակվեցին թե՛ Ձեզ վրա, թե՛ հեռակա ՀԷՑ-ի ու դրա ղեկավարության վրա, այս դեպքում՝ «Տաշիր գրուպի» և Սամվել Կարապետյանի վրա։

-Դե, հիմա, իրենք ուզում էին պարզաբանել, թե էս անջատումներն ինչով են պայմանավորված, հիմա էնքանով, ինչքանով որ մեր մասով էր, ես պատասխանել եմ, նաև ներկայացրել եմ էն հնարավոր միջոցառումները, որ տեսնում ենք, որ պետք է անել։ Էնտեղ կան միջոցառումներ, որ մենք ուղղակի միայն մեզնով չենք կարող անել։ Օրինակ՝ նույն ցանցային կանոնները, որ կան, որ էդ ամբողջ առևտրային և տեխնիկական փոխհարաբերություններն են կարգավորում՝ սպառող, մատակարար և այլն, էդ կանոնները, ըստ օրենքի, համատեղ պիտի արվեն՝ տարածքային կառավարման և ենթակառուցվածքների նախարարության հետ միասին։ Այսինքն՝ էնպես չի, որ էդտեղ միայն մենք կարող ենք ինչ-որ բաներ անել։

-Այսինքն՝ պատասխանատվությունը միակողմանի չէ։ Այդ դեպքում՝ կա՞ն կառույցներ, որոնք թերացել են, լավ չեն աշխատել կամ ինչ-որ բան պետք է անեին ու չեն արել։

-Ես չեմ կարծում, թե ինչ-որ մեկը թերացել է, կան խնդիրներ, բայց այդ խնդիրները, իմ կարծիքով, ըստ նախանշված պլանի լուծվում էին, ու կային նաև որոշակիորեն ավելի արագ տեմպերով էդ խնդիրները լուծելու առաջարկներ, էդ առաջարկները մենք արել ենք։

-Բայց հանրությունն էլ, ՔՊ-ն էլ ու երևի Դուք էլ՝ որպես սպառող, հավանաբար դժգոհ եք, որ այդ խնդիրները արագ չեն լուծվում։ Օրինակ՝ նույն ՀԷՑ-ի աշխատանքից գո՞հ եք։

-Չէ, գոհ չէի, դրա համար էն, ինչ մեր իրավասությունների շրջանակում է՝ տուգանքների խստացում և այլն, դա արել ենք։ Բայց այն, որ տեխնիկապես մաշված ենթակառուցվածք ունենք ու պետք է լուծումներ գտնենք՝ դա ձևափոխելու, էդ ամեն ինչը կախարդական փայտիկով չի լինում, դրա համար ժամանակ է պետք, միջոցառումներ են պետք, ու գուցե ոչ ականջահաճո որոշումներ է պետք կայացնել։

-Իսկ Ձեր հեռանալը կամ Ձեզնից ազատվելը կնպաստի՞ այդ խնդիրների արագ լուծմանը։

-Դրա համար, ենթադրում եմ, ինչ-որ ժամանակ կանցնի, կանդրառնանք էս խոսակցությանը, հա՛մ կվերլուծենք՝ ինչ են արել, հա՛մ էլ կհասկանանք՝ բերե՞ց լուծման, թե՞ չբերեց։ Համենայնդեպս, մենք առաջարկներ արել ենք, թե մեր տեսանկյունից ոնց ենք տեսնում, որ կարելի է խնդիրն ավելի արագ լուծել։

-Իսկ ինչո՞վ եք զբաղվում պաշտոնը թողնելուց հետո, և տեղյա՞կ եք՝ Ձեր փոխարեն ո՞ւմ են ուզում առաջադրել ՀԾԿՀ նախագահի պաշտոնում։

-Բացարձակ չգիտեմ՝ ում են նախատեսում, որ իմ փոխարեն պետք է լինի։ Ես էլ առայժմ ոչ մի բանով չեմ զբաղվելու՝ առնվազն առաջիկա մի ամիսը։

Մանրամասները՝ սկզբնաղբյուրում։