Ով օծված է Սրբալույս Մյուռոնով, չի կարող հրաժարվել սեփական պատմությունից, մերժել իր նախնյաց ժառանգությունը․ Կաթողիկոս
«Թող Աստծո բարեգութ կամքով նորօրհնյալ Սրբալույս Մյուռոնը երգնապարգև բարիքներ բերի մեր կյանքից ներս, հոգևոր ուժ ու վերհառնումի զորություն, պատերազմի արհավիրքներ ու կորուստներ կրած մեր ժողովրդին»,-այս մասին Սրբալույս Մյուռոնի օրհնության արարողության ժամանակ ասաց Ամենայն Հայոց Կաթողիկոսը։
Վեհափառն ասաց, որ Մյուռոնը տեսանելի նշանն է Սուրբ Հոգու ներկայության։ Մյուռոնի դրոշմամբ աստվածային աղբյուրն է բացվում անհատի և ժողովրդի կյանքում։
«Մյուռոնով օծյալը արժանի է դառնում աստվածային երկնառաք շնորհների, նորոգվում, բարին խորհելու և արարելու, ապրելու Աստծո երկյուղով և անվախ ընդդեմ չարի։ Սուրբ Մյուռոնի կնիքը հաստատումն է Քրիստոսի հետ միության և Սուրբ եկեղեցուն անդամագրության։ Աշխարհն այսօր կրկին փոթորկված է հակամարտություններով ու հակառակություններով, որոնք խաթարում են ներդաշնակությունն ընտանեկան կյանքում, մարդկային հարաբերություններում և հասարակության մեջ սերմանում թշնամանք և անհանդուրժողականություն, հրահրում պատերազամ, սփռում ավեր ու արհավիրքներ։
Մեր երկիրն ու ժողովուրդը նույնպես գտնվում են անվտանգային լրջագույն սպառնալիքների և աղետներից ու վշտագին կորուստներից վեր հառնումի հրամայականի առջև։ Մենք հավատում ենք, որ աշխարհն անտարբեր չէ ցավի ու բռնության նկատմամբ։
Հավատում ենք, որ մարդկային սրտերում չեն ցամաքել սերն ու կարեկցանքը։ Արդարություն ու իրավունքի գերակայություն հաստատելու ձգտումը։ Այս առիթն ունենալով՝ վերստին դիմում ենք միջազգային հանրությանը և մեր քույր եկեղեցիներին, ի դեմս մեզ աղոթակից եկեղեցական և դիվանագիտական ներկայացուցիչներին, որպեսզի ազդու միջոցներ գործադրվեն՝ զսպելու ադրբեջանի ծավալապաշտական նկրտումները և ուժի դիրքերից ներկայացվող նորանոր պահանջները։ Ինչպես նաև՝ վերադարձնելու Հայաստանից զաթած սահմանամերձ տարածքները, պաշտպանելու բռնի տեղահանված արցախահայության ոտնահարված իրավունքները, ազատ արձակելու գերեվարված հայորդիներին և յուրացումից ու ոչնչացումից փրկելու Արցախի հայկական հոգևոր մշակութային ժառանգությունը։ Այս բարդ իրավիճակի կարգավորման գործում հիմնական պարտավորությունն ու պատասխանատվությունը մերն է։ Հարկ է համախմբվել, զերծ պահել հայրենի մեր երկիրը նոր ցնցումներից ու կորուստներից, փարատել ապագայի շուրջ առկա տագնապներն ու մտահոգությունները։
Հեռատեսության ենթարկել սխալ ու ազգավնաս ընթացքները։ Առավել ամրապնդել Հայաստան-սփյուռք հարաբերությունները։ Ներքաղաքական կյանքում սկիզբ դնել առողջ երկխոսության և ելքի ուղիներ գտնել հայրենիքում մեր ժողովրդի ապահով ու անվտանգ կյանքի վերականգնմանը՝ մեզ ուղեկից դարձնելով արդարությունը, խիզախությունն ու ազնվությունը։ Թող այս նոր Մյուռոնը լինի հույսի և վերհառնումի Մյուռոն»,-նշեց նա։