Հնդկաստանում 43 մարդ է խեղդվել, այդ թվում՝ երեխաներ․ հայտնի է պատճառը

Հնդկաստանում հինդուական Ջիթիյա Պարվ տոնախմբության ժամանակ 43 մարդ է խեղդվել, այդ թվում՝ 37 երեխա, հաղորդում է Deutsche Welle պարբերականը:

Միջադեպերը տեղի են ունեցել Բիհարի նահանգի մի քանի շրջաններում, երբ մարդիկ ծիսական լոգանք են ընդունել գետերում և լճերում, որոնց մակարդակը բարձրացած է եղել հորդառատ անձրևների պատճառով։

Ըստ հրապարակման՝ տեղի իշխանության ներկայացուցիչներից մեկն AFP-ին հայտնել է, որ մարդիկ անտեսել են գետերի և լճերի բարձր մակարդակով պայմանավորված վտանգը։ Ըստ այլ պարբերականների՝ ևս երեք հոգու մարմին դեռ դուրս չի բերվել ջրից։ 

Հնդկաստանում կրոնական տոնախմբությունների ժամանակ երկրպագության վայրերում ողբերգական ելքով միջադեպեր հաճախ են լինում։ 2023 թվականին նույն տոնախմբության ժամանակ 22 մարդ էր մահացել, այդ թվում՝ 15 երեխա։