Նախկինում 96% ռազմատեխնիկական համագործակցություն կար ՌԴ հետ, այժմ 10-ից ցածր է, ինչը մեր հաջողությունն է. Գրիգորյան

Եթե անվտանգության ոլորտում մի շարք հաջողություններ ունենք, նույնը չի կարելի ասել տնտեսության ոլորտի մասին:

Այս մասին Հայկական երկրորդ գլոբալ գագաթնաժողովի պանելային քննարկման ժամանակ հայտարարեց Անվտանգության խորհրդի քարտուղար Արմեն Գրիգորյանը՝ նշելով նաև ձախողումները:

«Մեր ձախողումը, եթե շատ պարզ ասենք առաջնային անվտանգության համակարգի մեխանիզմը սա է եղել՝ առաջնային սպառնալիքի դեպքում զանգել Մոսկվա, ուրիշ որևէ տարբերակ չկար: Այժմ այդպես չէ, այժմ որոշումները մենք ենք սկսել կայացնել սահմանազատումից սկսած, ծանր ու քննադատությունների արժանացող որոշումների մասին է խոսքը»,- ասաց նա:

Անդրադառնալով հաջողություններին՝ Արմեն Գրիգորյանը նշեց. «Հաջողություններից մեկը, որ հաճախ ենք նշում, ռազմատեխնիկական համագործակցությունն է: Նախկինում մենք 96 տոկոսից ավելի ռազմատեխնիակական համագործակցություն ենք ունեցել ՌԴ հետ, այսօր այդ թիվը 10 տոկոսից էլ ցածր է, ինչը վերջին 3-4 տարվա քաղաքականության հաջողությունն է: Այսօր մենք ունենք մի քանի կարևոր գործընկերներ ռազմատեխնիկական համագործակցության ոլորտում, դրանցից մեկը Հնդկաստանն է, Ֆրանսիան»,- ասաց նա:

ԱԽ քարտուղարը տեղեկացրեց, որ փնտրում են նոր գործընկերներ, որ այդ ուղղությամբ տարվող աշխատանքներն ավելի արդյունավետ լինեն:

«Նաև նպատակ ունենք՝ ռազմատեխնիկական արտադրության մոտ 25-30 տոկոսը լինի Հայաստանի ներսում: Պետք է կարողանանք դա անել և ունենալ 4-5 գործընկեր, որոնց հետ ծավալը չի գերազանցի 20 տոկոսը»,- նշեց Գրիգորյանը: