Վրաստանում Ուկրաինայի հավատարմատարին հետ կանչելու որոշումը կապված է լվացքի մեքենաների գնելու հետ. Կոբախիձե

Վրաստանի վարչապետ Իրակլի Կոբախիձեն անդրադարձել է Ուկրաինայի կողմից գործերի ժամանակավոր հավատարմատարի հետկանչմանը՝ նշելով, որ դա քաղաքական գործողություն չէ, այլ կապված է դեսպանատան ներկայացուցչի կողմից լվացքի մեքենաների ձեռքբերման հետ։ Այս մասին հաղորդում է Վրաստանի հանրային հեռարձակող ընկերությունը։

«Ի տարբերություն դեսպանի հետկանչման, սա քաղաքական ակտ չէ, դա կապված է կոնկրետ դեսպանատան ներկայացուցչի կողմից կենցաղային իրերի գնման հետ, որը, ուկրաինական իշխանությունների կարծիքով, նա չպետք է գներ պատերազմի պայմաններում. խոսքը լվացքի մեքենաների մասին է», - ասել է Վրաստանի վարչապետ Իրակլի Կոբախիձեն։

Վրաստանի կառավարության ղեկավարի խոսքով՝ իրականում սա այնպիսի որոշում չէ, ինչպիսին ընդունվել է 2022 թվականին դեսպանին հետ կանչելու ժամանակ։

«Այն ժամանակ դա զուտ քաղաքական որոշում էր։ Այն ժամանակ, քանի որ մենք չմիացանք պատժամիջոցներին և կառավարության պաշտոնական հավանությամբ մարտական ​​կամավորների չուղարկեցինք Ուկրաինա, Ուկրաինայի իշխանությունները հետ կանչեցին դեսպանին Վրաստանից։ Դա քաղաքական ակտ էր։ Այս դեպքում, մեր տեղեկություններով, սա քաղաքական ակտ չէ», - ասել է Կոբախիձեն։

Ավելի վաղ Ուկրաինայի նորանշանակ արտգործնախարար Անդրեյ Սիբիհան հայտարարել էր Վրաստանում Ուկրաինայի գործերի ժամանակավոր հավատարմատարին հետ կանչելու մասին՝ նշելով, որ «պատերազմող երկրների դեսպանները չեն կարող կտրվել պատերազմի իրողություններից»։