Հատուկջոկատայիններն ազատ են արձակել Վոլգոգրադի գաղութում գտնվող պատանդներին

Ռուսական տելեգրամյան ալիքների փոխանցմամբ՝ ավարտվել է Վոլգոգրադի թ․19 ուղղիչ գաղութում հատուկջոկատայինների օպերացիան։

Ռուսական լրատվամիջոցների փոխանցմամբ՝ հատուկջոկատայինների գրոհը տևել է կես ժամ՝ տեղական ժամանակով 16.00-16.30-ը։ Նշվում է, որ գրոհի ժամանակ 23-ամյա տաջիկստանցի բանտարկյալ Նավրուզին փորձել է իրեն պայթեցնել մահապարտի ժիլետի օգնությամբ: Սակայն համակարգը չի աշխատել, և հատուկջոկատայինները հասցրել են նրան վերացնել։

Ըստ լրատվամիջոցների՝ պատանդառուները եղել են չորս հոգի․ 2-ն՝ Ուզբեկստանի, 2-ը՝ Տաջիկստանի քաղաքացիներ։

Բոլոր պատանդներն ազատ են արձակվել, իսկ չորս բանտարկյալները վնասազերծվել են։

Հիշեցնենք՝ կարգապահական հանձնաժողովի նիստում չորս բանտարկյալ հարձակվել էր աշխատակիցների վրա՝ պատանդ վերցնելով նրանց։ Բանտարկյալները սպանել էին աշխատակիցներից մեկին, իսկ 4-ը, այդ թվում՝ կալանավայրի պետ Անդրեյ Դեվյատովը, չնայած ստացած ծանր մարմնական վնասվածքներին, կարողացել էին փախչել. նրանք այժմ վերակենդանացման բաժանմունքում են՝ ծանր վիճակում։