ՕԽ-2024. Վարազդատ Լալայանը պոկում վարժությունից հետո երրորդն է

Փարիզում ընթացող Օլիմպիական խաղերում այսօր մրցահարթակը տրամադրվեց գերծանր քաշային ծանրորդներին․ պայքարի դուրս եկավ մեր երրորդ ծանրորդն ու վերջին օլիմպիականը՝ 2024 թ. Եվրոպայի չեմպիոն և աշխարհի գավաթակիր Վարազդատ Լալայանը։ Առաջին մոտեցման ժամանակ Լալայանը բարձրացրեց 210, երկրորդի ժամանակ՝ 215 կգ-անոց ծանրաձող, երրորդ մոտեցումը՝ 218 կգ-անոց ծանրաձող բարձրացնելը, չհաջողվեց։ Պոկում վարժությունում Լալայանը զբաղեցրեց երրորդ հորիզոնականը։

Երկրորդ տեղում աշխարհի ու Եվրոպայի 7-ակի չեմպիոն, կրկնակի օլիմպիական չեմպիոն, վրացի Լաշա Տալախաձեն է, 216 կգ արդյունքով պոկում վարժությունում հաղթեց Բահրեյնը ներկայացնող հայ ծանրորդ Գոռ Մինասյանը:

Ավելի վաղ՝ Հայաստանի օլիմպիական հավաքականի անդամ, Եվրոպայի չեմպիոն, երիտասարդների աշխարհի կրկնակի չեմպիոն, 102 կգ քաշային ծանրորդ Գարիկ Կարապետյանը Փարիզում անցկացվող ամառային 33-րդ Օլիմպիական խաղերում երկամարտի 398 կգ արդյունքով զբաղեցրել է 4-րդ տեղը:

102 կգ քաշայինների պայքարում Կարապետյանը պոկում վարժությունն ավարտել է 186 կգ արդյունքով, իսկ հրում վարժությունում գլխավերևում պահել է 212 կգ կշռող ծանրաձողը:

Հայաստանի ծանրամարտի հավաքականի մյուս անդամ, 89 կգ քաշային Անդրանիկ Կարապետյանն էլ Օլիմպիական խաղերում զբաղեցրել է 7-րդ տեղը՝ երկամարտում ցույց տալով 370 կգ արդյունք (170+200 կգ): 

Փարիզում ավարտին մոտեցող Օլիմպիական խաղերում այսօր մրցագորգ է դուրս եկել նաև Եվրոպայի չեմպիոն, աշխարհի առաջնության բրոնզե մեդալակիր, աշխարհի անհատական գավաթի խաղարկության հաղթող 65 կգ քաշային ազատ ոճային ըմբիշ Վազգեն Թևանյանը: Վերջինս մեկնարկային՝ 1/8 եզրափակչում մրցել է Վրաստանի ներկայացուցիչ Գոդերձի Ձեբիաշվիլիի հետ և 11:0 հաշվով ժամանակից շուտ վստահ հաղթանակի հասել մրցակցի նկատմամբ։ Հայ ըմբիշը քառորդ եզրափակչում գոտեմարտել է Մոնղոլիայի ներկայացուցիչ Տուլգա Թումուր Օչիրի հետ և 5:1 հաշվով հաղթելուց հետո վերջին րոպեներին 5:7 հաշվով ցավալի պարտություն է կրել՝ չկարողանալով դուրս գալ կիսաեզրափակիչ:

Հայաստանի ներկայացուցիչներն Օլիմպիական խաղերում դեռևս երկու արծաթե և մեկ բրոնզե մեդալ են նվաճել: