Զինծառայության գրանցումից հրաժարվողները կզրկվեն ՌԴ քաղաքացիությունից

Ռուսաստանի նախագահ Վլադիմիր Պուտինն օրենք է ստորագրել զինվորական ծառայության գրանցումից հրաժարվելու դեպքում ձեռք բերված ՌԴ քաղաքացիությունից զրկելու մասին, հայտնում է ՌԻԱ Նովոստին։

«Զինվորական հերթապահության և զինվորական ծառայության մասին» և «Ռուսաստանի Դաշնության քաղաքացիության մասին» հիմնական օրենքները լրացվում են դիսպոզիտիվ նորմով, ըստ որի՝ Ռուսաստանի քաղաքացիություն ձեռք բերած անձի կողմից զինվորական ծառայության սկզբնական գրանցման պարտավորությունը չկատարելը հիմք են հանդիսանում աղաքացիությունը դադարեցնելու համար»,- ասվում է օրենքում:

Համապատասխան փաստաթուղթը տեղադրված է իրավական ակտերի պաշտոնական հրապարակման կայքում։

Վլադիմիր Պուտինը ստորագրել է նաև օրենք, որը սահմանում է Ռուսաստանում գտնվելու օրինական հիմքեր չունեցող միգրանտների արտաքսման նոր իրավական ռեժիմ։ Փաստաթուղթը հասանելի է իրավական ակտերի պաշտոնական հրապարակման կայքում։

Ռեժիմը կկիրառվի օտարերկրյա քաղաքացիների կամ քաղաքացիություն չունեցող անձանց նկատմամբ՝ ապահովելու նրանց մեկնումը կամ Ռուսաստանում գտնվելու օրինական հիմքերի ձեռքբերումը։ Այն նախատեսում է որոշակի իրավունքների ու ազատությունների սահմանափակումներ և վերահսկման միջոցների կիրառում միգրացիայի ոլորտում։

Օտարերկրացիները, որոնք նկատմամբ կսահմանվի արտաքսման նոր ռեժիմը, չեն կարողանա փոխել բնակության վայրը կամ մնալ երկրում առանց Ներքին գործերի մարմնի թույլտվության, ճանապարհորդել բնակության շրջանից դուրս, տրանսպորտային միջոց վարել, սեփականություն ձեռք բերել, գրանցել ամուսնություն, գրանցել անշարժ գույք կադաստրային ռեգիստրում, բացել բանկային ավանդ և իրականացնել այլ բանկային գործառնություններ։ 

Օրենքը սահմանում է, որ վերահսկվող անձը չի կարող դառնալ կրոնական կամ հասարակական կազմակերպության անդամ կամ հիմնադիր։ Նախատեսվում է ստեղծել արտաքսման ռեժիմով միգրանտների ռեգիստր։ Դրա կառավարողը լինելու է Ներքին գործերի նախարարությունը։

Նշվում է, որ Ներքին գործերի մարմիններն իրավունք կունենան բանկերից տեղեկություններ ստանալ սահմանափակման տակ գտնվող քաղաքացիների հաշիվների մասին։ Ներքին գործերի նախարարությունը հնարավորություն կունենա մուտք գործել այն տարածքներ, որտեղ գտնվում է վերահսկվող անձը, ինչպես նաև վերահսկել դրանք աշխարհագրական դիրքով։

Նախատեսվում է, որ արտաքսման ենթակա օտարերկրյա քաղաքացիները կտեղավորվեն անվտանգության մարմինների հատուկ նշանակված շենքերում կամ հատուկ հաստատություններում և կպահվեն այնտեղ մինչև որոշման կատարումը։ Եթե իշխանությունները որոշեն, որ անչափահասի համար անցանկալի է մնալ երկրում, ապա նմանատիպ որոշում կկայացվի նրա օրինական ներկայացուցչի վերաբերյալ։

Սահմանային իշխանությունները կվերահսկեն ոչ միայն մուտք գործողներին, այդ թվում՝ ապաստան հայցողներին, այլև նրանց, ովքեր դուրս են գալիս և ճանապարհորդում են տարանցիկ ճանապարհով։ Բացի այդ, օրենքը մեկ տարվա ընթացքում կրճատում է Ռուսաստանում առանց վիզայի ժամանակավոր գտնվելու ժամկետը մինչև 90 օր։

Օրենքն ուժի մեջ է մտնում պաշտոնական հրապարակման օրվանից 180 օր հետո, բացառությամբ առանց վիզայի ռեժիմի կրճատման մասին դրույթի՝ այն ուժի մեջ կմտնի 2025 թվականի հունվարի 1-ից։