«Առողջական խնդիրներ ունեմ, նաև հոգեբանական ոչ կայուն վիճակում եմ». լողորդ Արթուր Բարսեղյանը ժամանակավոր դադար է վերցնում կարիերայում

Հայաստանի լողի հավաքականի անդամ Արթուր Բարսեղյանը հայտարարել է կարիերայում ժամանակավոր դադար վերցնելու մասին:

Ինչպես փոխանցում է «Արմենպրես»-ի թղթակիցը, Բարսեղյանն այդ մասին հայտարարել է լրագրողների հետ զրույցում։

«Դեռ երկար ժամանակ մտքումս կար սպորտից հեռանալը, սակայն չէի կողմնորոշվում, թե երբ պետք է այդ մասին հայտնեի ամբողջ հայությանն ու սպորտի աշխարհին: Հեռանում եմ, քանի որ առողջական խնդիրներ ունեմ, նաև հոգեբանական ոչ կայուն վիճակում եմ: Հիմա ուզում եմ ինքս ինձ հասկանամ ու գտնեմ իմ տեղը սպորտային աշխարհից դուրս»,-ասաց Բարսեղյանը:

Վերջինիս խոսքով` երկար ժամանակով դադար է վերցնում:

«Օլիմպիական խաղերին մասնակցեցի այնպես, ինչպես կարողացա: Ինչպես հասկացա, գլխացավեր ու հայմորիտ ունեմ: Իմ կարծիքով՝ տաղանդիս համար դռները փակվեցին 19 տարեկանում: Լավ արդյունքներ էի գրանցում պատանի հասակում: Այդ ժամանակներից մինչ օրս հիասթափությունը հետապնդում է ինձ»,-առանձնացրեց Բարսեղյանը:

Հայաստանի օլիմպիական հավաքականի անդամ, լողորդ Արթուր Բարսեղյանը 100 մետր ազատ ոճում ընդհանուր արդյունքով 56-րդն է:

Փարիզի «La Defense» արենայում կայացած 100 մետր ազատ ոճի տղամարդկանց պայքարում Բարսեղյանն իր լողահերթում 7-րդն էր (51.54), իսկ ընդհանուր արդյունքով՝ 56-րդը: