Դատախազությունը Փարամազյանից և հարազատներից պահանջում է 6 անշարժ գույք և 1 միլիարդ 13 միլիոն դրամ

Ապօրինի ծագում ունեցող գույքի բռնագանձման մասին հերթական հայցադիմումն է դատարան ուղարկվել, դատախազությունը պահանջում է Քաջարանի նախկին քաղաքապետից ու նրա հարազատներից բռնագանձել 3 բնակարան Երևանում, 2 բնակարան՝ Քաջարանում, նաև բենզալցակայան, 2 ավտոմեքենա, բաժնեմասեր ու 5,5 միլիոն դրամի ավանդներ։

6 անշարժ գույք և 1 միլիարդ 13 միլիոն դրամ․ դատախազության պահանջն է Քաջարան համայնքի նախկին ղեկավար Մանվել Փարամազյանից, նրա հորից, կնոջից և քենուց։

Այս մասին Լուրերին տված հարցազրույցում ասել է ՀՀ ԳԴ Ապօրինի ծագում ունեցող գույքի բռնագանձման գործերով վարչության դատախազ Ռուզաննա Խուդավերդյանը։

«Մասնավորապես բռնագանձման ենթական են Երևանում գտնվող 3 բնակարան, Քաջարանում գտնվող 2 մեքենա և մեկ գազալցման կայան, բռնագանձման ենթական են նաև 2 տրանսպորտային միջոց, 2 իրավաբանական անձանցում բաժնեմասեր, ընդհանուր թվով 3 ավանդներ շուրջ 5 ու կես ՀՀ միլիոն դրամի չափով։

Առաջին ապօրինի գույքը 7 տարի համայնքը ղեկավարող Փարամազյանը ձեռք է բերել 2011 թվականին, խոսքը գազալցակայանի մասին է։ Այդ գույքը 2017 թվականից վարձակալությամբ տրամադրված է պղնձամոլիբդենային կոմբինատին, մինչ օրս վարձակալության պայմանագիրը գործում է ըստ իրավասու մարմնի տվյալների։

Եվ քանի որ նշված գույքը հանդիսանում է ապօրինի, ենթակա է բնագանձման, բնականաբար բռնագանձման ենթական են նաև վարձակալությունից ստացված գումարները, նույն համամասնությամբ, ինչ–որ գույքի ապօրինությունը»,- ասել է դատախազը։

Ապօրինի հարստացմամբ անցնող Փարամազյանը գազալցակայանը մինչ օրս վարձով է տալիս «Զանգեզուրի պղնձամոլիբդենային կոմբինատ»-ին, բռնագանձման ենթական են նաև վարձակալությունից ստացված գումարները: