Ես ուզում եմ հասկանալ՝ մենք ԵՄ դրոշի ներքո ի՞նչ ռազմական գործողությունների ենք մասնակցելու. Բենիամին Մաթեւոսյան

ԵՄ-ի կողմից մեր զինված ուժերին հատկացվող 10 մլն եվրոն կարող ենք օգտագործել միայն բժշկական որոշակի կարիքներ հոգալու համար: Այս մասին News.am-ի հետ զրույցում ասաց քաղաքագետ Բենիամին Մաթեւոսյանը՝ անդրադառնալով նրան, որ ԵՄ խորհուրդը որոշել է 10 մլն եվրոյի չափով օգնություն տրամադրել Հայաստանի զինված ուժերին:

«Մենք հիշում ենք, որ Հունգարիան ուներ հետեւյալ դիրքորոշումը, որ եթե ԵՄ-ն 10 մլն եվրո հատկացնում է Հայաստանին, որեմն 10 մլն էլ պետք է հատկացնի Ադրբեջանին, եւ մենք տեսանք, որ այո, այլ հիմնդրամից 10 մլն հատկացվելու է Ադրբեջանին եւ գնալու է նրան, որ մեր հայկական Արցախում ականազերծման աշխատանքներ պետք է իրականացվեն:

Երրորդը, ԵՄ արտաքին հարաբերությունների եւ անվտանգության հարցերով ներկայացուցիչ Ժոզեպ Բորելը կարեւոր շեշտադրում արեց, որ մի կողմից, իհարկե, Հայաստան-ԵՄ հարաբերություններն ավելի են մերձենում, բայց նաեւ ասաց, որ սա կարեւոր է նաեւ ապագայում, որ Հայաստանը ԵՄ դրոշի տակ մասնակցի ինչ-որ գործողությունների: Ես ուզում եմ հասկանալ՝ մենք ԵՄ դրոշի ներքո ի՞նչ ռազմական գործողությունների ենք մասնակցելու:

Այսօր նաեւ հայտնի դարձավ, որ ԵՄ-ն բանակցություններ է վարում Ադրբեջանի հետ, որ այն ռուսական գազը, որ իրենք ստանում էին Ուկրաինայից, հիմա պետք է ստանան Ադրբեջանից: Հիմա եկեք հասկանանք, թե ԵՄ-Հայաստան եւ ԵՄ-Ադրբեջան փոխգործակցություններն ինչ մակարդակների են»,-ասաց փորձագետը:

Նրա խոսքով, նախկինում էլ մենք ԵՄ-ին ֆինանսական աջակցության մասին հայտարարություններ ենք լսել, այդ թվում 44-օրյա պատերազմից հետո. «Բայց այդ եվրոները մենք կամ չտեսանք, կամ եկան, այնպիսի ուղղությամբ գնացին, որ մենք տեղյակ չեղանք»,-ասաց նա: