Նորատուսցի Արայի որդու մասնակցությամբ միջադեպից նոր հանգամանքներ են պարզվել
![](/timthumb.php?src=disc/19-07-24/041a65f8929f6669f53117338b9d8e0f.jpg&w=450)
Նորատուսցի Արայի որդու՝ 19-ամյա Լյովա Բանդուրյանի մասնակցությամբ միջադեպից նոր հանգամանքներ են պարզվել, հայտնում է shamshyan.com-ը։
Ըստ ձեռք բերված ապացույցների՝ ժամը 19։50-ի սահմաններում Տավուշի մարզի գյուղերից մեկի բնակիչ 40-ամյա Միսակ Փ․-ն և Գեղարքունիքի մարզի գյուղերից մեկի բնակիչ 19-ամյա Լյովա Բ․-ն Վ․ Ա․-ի, Ս․ Ս-ի և Գ․ Ս․-ի հետ գտնվել են «Best Western Bohemian Resort» հյուրանոցային համալիրի համարներից մեկում, երբ դրսից լսել են վիճաբանության ձայներ և հայհոյանքներ։ Բոլորը դուրս են եկել և դիտողություն արել, որից հետո Ա․ Աֆիյանի, Ա․ Ալոյանի, Է․ Աֆյանի և Գ․ Ղազարյանի հետ մտել են վիճաբանության մեջ, որը վերածվել է ծեծկռտուքի։
Այդ ժամանակ Միսակ Փ․-ն Աֆյանի ձեռքին նկատել է ատրճանակի նմանվող առարկա, փորձել է նրանից խլել այն և բռնել է նրա ձեռքը, որի ընթացքում էլ մեկ կրակոց է արձակվել հատակի ուղղությամբ։ Այդ ժամանակ նրանց է մոտեցել նշված հյուրանոցային համալիրի անվտանգության աշխատակից Ա․ Ալոյանը, ով նույնպես բռնել է Է․ Աֆյանի ձեռքից՝ փորձելով նրանից վերցնել ատրճանակը։ Այդ ժամանակ Միսակ Փ․-ն իր մոտ պահվող ատրճանակով մեկ անգամ կրակել է Է․ Աֆյանի ուղղությամբ, իսկ առաջացած քաշքշուկի ընթացքում կարողացել է վերցնել նրա ձեռքի ատրճանակը և ևս մեկ կրակոց արձակել, որի հետևանքով Ա․ Ալոյանին պատճառվել է հրազենային վնասվածք, իսկ Միսակ Փ․-ն իր մոտ եղած ատրճանակով կրակոց է արձակել Ա․ Աֆիյանի ուղղությամբ և կրակոցը դիպել է վերջինի որովայնին։
Քննիչի որոշմամբ Լյովա Բ․-ն, ով քրեական պատմություններով հայտնի նորատուսցի Արա Բանդուրյանի տղան է, և Միսակ Փ․-ն ձերբակալվել և տեղափոխվել է ոստիկանության Սևանի բաժնի ձերբակալվածների պահման վայր։
Ձերբակալման պահին «քոթեջ»-ի սեղանի վրա հայտնաբերվել է «Մակարով» տեսակի ատրճանակին նմանվող ատրճանակ։ Հայտնաբերվել է նաև ևս մեկ ատրճանակ։
Քննիչի որոշմամբ նշանակվել դիակի դատաբժշկական, դատահետքաբանական, դատաձգաբանական, մատնադրոշմային փորձաքննություններ։
Հիշեցնենք, որ հուլիսի 17-ին վիճաբանություն ու ծեծկռտուք էր տեղի ունեցել «Best Western Bohemian Resort» հանգստյան գոտում, որի ժամանակ կրակոցներ են հնչել։ Միջադեպի հետևանքով երեք մարդ հրազենային վնասվածքներով տեղափոխվել է հիվանդանոց, որտեղ ժամեր անց վիրավորներից Արսեն Աֆիյանը մահացել է։