Զարուհի Փոստանջյանը և Նիկոլ Փաշինյանի փաստաբանը հաղորդումներ են ներկայացրել միմյանց դեմ

Փաստաբան Զարուհի Փոստանջյանը պահանջում է քրեական պատասխանատվության ենթարկել և արտոնագրից զրկել Նիկոլ Փաշինյանի փաստաբանին՝ Արման Ներսիսյանին։ Վերջինս էլ պահանջում է պատասխանատվության ենթարկել Փոստանջյանին՝ իրեն հոգեբանորեն ճնշելու և այդպիսով փաստաբանի օրինական գործունեությանը խոչընդոտելու համար։

Միջադեպը տեղի է ունեցել երեկ՝ Երևանի ընդհանուր իրավասության քաղաքացիական դատարանի բակում՝ «Նիկոլ Փաշինյանն ընդդեմ Զարուհի Փոստանջյանի» գործով դատական նիստից հետո։ Նշված հայցը ներկայացվել էր դեռևս 2021թ․։ Դատարանը որոշել էր մի մասով բավարարել հայցապահանջը՝ պարտավորեցնելով Զարուհի Փոստանջյանին հերքում տարածել 5 000 տպաքանակ ունեցող օրաթերթում, ինչը, սակայն, չի իրականացվել, Զարուհի Փոստանջյանի պնդմամբ՝ դրա անհնարինության պատճառով, քանի որ ՀՀ-ում այլևս 5 000 տպաքանակ ունեցող թերթ չկա․ «Նիկոլ Փաշինյանն անցյալ տարի նույնիսկ Հայաստանի Հանրապետություն թերթն է փակել, այդ թվում՝ իր այդ՝ «Թուրքական ժամանակը»»,- «Փաստինֆո»-ի հետ զրույցում ասել է Փոստանջյանը։

Դատական ակտը չկատարելու վերաբերյալ գործով այժմ քրեական հետապնդում է իրականացվում Փոստանջյանի նկատմամբ՝ նրա գնահատմամբ՝ «Նիկոլ Փաշինյանի նախաձեռնությամբ»։ Հայցադիմումը փոխհատուցման պահանջի մասով մերժվել էր, ինչը բոլոր ատյաններում բողոքարկման արդյունքում կրկին քննարկման առարկա է դարձվում առաջին ատյանի դատարանում, այս անգամ՝ Նիկոլ Փաշինյանի նոր փաստաբանի ներգրավմամբ։ Հենց այս գործով նիստից հետո էլ տեղի է ունեցել միջադեպը։

Զարուհի Փոստանջյանը «Փաստինֆո»-ի հետ զրույցում ասել է, որ նախկինում Նիկոլ Փաշինյանի շահերը ներկայացնում էր այլ փաստաբան, որն առավել զուսպ էր պահում իրեն, արտառոց վարքագիծ չուներ։

«Նախնական նիստի գործընթաց է տեղի ունենում, նիստն ավարտվեց, դուրս ենք եկել արդեն դատարանի դահլիճից, բարձրացանք, աստիճաններով, որ արդեն դուրս գանք, իրեն շատ ագրեսիվ էր պահում, ինչ-որ բառեր էր ասում՝ իրեն նույնականացնելով Նիկոլ Փաշինյանի հետ, կարծես ինքն էր վիրավորվում Նիկոլ Փաշինյանի փոխարեն։ Խոսելիս ասացի, որ եթե այդպես է, նկարեմ, որ ցույց տամ՝ ով է Նիկոլ Փաշինյանի փաստաբանը։ Այդ պահին, որ արդեն ուզում էի հեռախոսով նկարել, ձեռքիցս քաշեց հեռախոսս, վերցրեց, ձեռքս վնասվեց, հեռախոսս մի քանի րոպե պահեց իր մոտ, հետո տվեց կարգադրիչներից մեկին։ Ասացի՝ սպասիր, զանգում եմ ոստիկանություն, հաղորդում՝ ներկայացնեմ։ Չսպասեց, նստեց մեքենան և դիմեց փախուստի»,- երեկ տեղի ունեցած դեպքից մանրամասներ է հայտնել Զարուհի Փոստանջյանը՝ տեղեկացնելով նաև, որ Նիկոլ Փաշինյանի փաստաբանը հայտնել է, թե ինքն է պատրաստվում հանցագործության մասին հաղորդում ներկայացնել՝ հանրային վայրում իր անձնական տվյալի իբրև հավաքագրման համար։ Փոստանջյանը հայտնել է, որ և՛ հանցագործության մասին հաղորդում է ներկայացրել, և՛ գրավոր բողոքով դիմել է Փաստաբանների պալատին՝ պահանջելով զրկել նրան արտոնագրից։ Փոստանջյանը կասկածում է, որ քրեական վարույթ նախաձեռնվի։

Տեղի ունեցած միջադեպի մասին այլ դիրքորոշում ունի մյուս կողմը՝ փաստաբան Արման Ներսիսյանը, որը ևս հանցագործության մասին հաղորդում է ներկայացրել՝ բարձրացնելով Փոստանջյանին պատասխանատվության ենթարկելու հարցը։ Ներսիսյանը «Փաստինֆո»-ի հետ զրույցում պատմել է, որ դեռևս նիստերի դահլիճում վիրավորական արտահայտություններ են հնչել իր վստահորդի՝ Նիկոլ Փաշինյանի և «Քաղաքացիական պայմանագիր» կուսակցության հասցեին, իսկ ինքը, տեսնելով, որ այլ քաղաքացիներ ևս կան, խնդրել է լռել, սակայն Փոստանջյանն իբրև չի ենթարկվել իր հորդորներին, շարունակել է վիրավորական արտահայտություններ անել։ Ներսիսյանի խոսքով՝ երբ դուրս է եկել, որ հեռանա՝ Փոստանջյանն իրեն մեղադրել է, թե ինչու է պաշտպանում Նիկոլ Փաշինյանին, իսկ երբ ինքը հորդորել է իր նկատմամբ ներգործություն չունենալ, Փոստանջյանը հանել է հեռախոսը․ «Սկսել է ահաբեկել, թե նկարելու է՝ խայտառակելու»։

Փաստաբանը պնդել է, թե ինքը որևէ բռնություն չի գործադրել, պարզապես փորձել է ձեռքով ծածկել հեռախոսը, որ իրեն չլուսանկարեն։ Վնասվածք հասցնելու վերաբերյալ պնդումները, ըստ Ներսիսյանի, խեղաթյուրված են։

Փաստաբան Արման Ներսիսյանը հանցագործության մասին հաղորդում է ներկայացրել՝ պահանջելով քրեական վարույթ նախաձեռնել փաստաբանի մասնագիտական գործունեությանը խոչընդոտելու հատկանիշներով, քանի որ,նրա խոսքով, իր նկատմամբ հոգեբանական ճնշում է գործադրվել։