Տատիկ-պապիկի հետ գետն ընկնելու հետևանքով մահացած 8-ամյա Լիկան Էջմիածնից էր․ մանրամասներ (տեսանյութ)
![](/timthumb.php?src=disc/11-06-24/d550e02ceb0f061b6da940cc7669ba0b.jpg&w=450)
Oragir.News-ը գրում է․ «Հունիսի 8-ին տատիկի և պապիկի հետ ավտոմեքենայով Հրազդան գետն ընկնելու հետևանքով մահացած 8-ամյա Լիկա Մալխասյանն Արմավիրի մարզի Վաղարշապատ համայնքից էր։
Լիկան սովորում էր Վաղարշապատի Մեսրոպ Մաշտոցի անվան համար 1 հիմնական դպրոցի 2-րդ դասարանում։
«Շատ ակտիվ, խելացի, հրաշք բալիկ էր։ Կատարվածը բոլորիս համար մեծ ցնցում է»,- Oragir.News-ի հետ զրույցում ասաց դպրոցի տնօրեն Լիլիթ Պետրոսյանը։
8-ամյա աղջնակի հոգեհանգիստը տեղի կունենա վաղը, հուղարկավորությունը՝ հունիսի 12-ին։
Ինչպես ավելի վաղ դեպքի վայրից հայտնել էր ֆոտոլրագրողը, հունիսի 8-ին ողբերգական դեպք էր տեղի ունեցել Գեղարքունիքի մարզում: Ժամը 22:20-ի սահմաններում ՀՀ Ներքին գործերի նախարարության փրկարար ծառայության 911 ճգնաժամային կառավարման ազգային կենտրոն ահազանգ էր ստացվել, որ Երևան-Սևան-Իջևան ավտոճանապարհի «Հարսնաքար» ռեստորանային համալիրի հարևանությամբ «Mitsubishi» մակնիշի բեռնատարը դեպի Երևան ընթանալիս դուրս է եկել հանդիպակաց գոտի բախվել է կամրջի բետոնե հատվածին, կոտրել երկաթե ճաղավանդակները և ընկել Հրազդան գետը:
Ջրասուզակները մի քանի ժամ որոնողական աշխատանքների արդյունքում գետից դուրս էին բերել աղջիկ երեխայի, և կնոջ դի, իսկ ավտոմեքենայի խցիկում վարորդի մարմինը, ավտոմեքենան վերամբարձ կռունկով դուրս էր բերվել և նոր միայն հնարավոր էր եղել վարորդի դին դուրս բերել խցիկից։
Դեպքի փաստով Սևանի քննչական բաժնում նախաձեռնվել է քրեական վարույթ:
Ֆոտոլրագրողը հայտբելլ էր, որ Սևանի ոստիկաններն ու Սևանի քննչական բաժինը պարզել են վարորդի և մահացածների ինքնությունը։
Ավտոմեքենան վարել էր Երևանի բնակիչ 69-ամյա Սարո Կարապետյանը, ում դին ջրասուզակը հայտնաբերել էր ավտոմեքենայի խցիկում, իսկ ավտոմեքենայից դուրս՝ գետում, հայտնաբերվել էին Երևանի բնակիչ 61-ամյա Հասմիկ Հարությունյանի և Արմավիրի մարզի բնակիչ 8-ամյա ԼիկաՄ.-ի դիերը։
Գ. Շամշյանի տեղեկություններով՝ Ս. Կարապետյանն ու Հ. Հարությունյանը ամուսիններ էին, իսկ Լիկա Մ.-ն նրանց թոռնուհին էր։