Դատարանը Լևոն Երանոսյանի նկատմամբ համաներում կիրառեց

Երևանի ընդհանուր իրավասության դատարանը հրապարակեց Ոստիկանության զորքերի նախկին հրամանատար, ոստիկանության գեներալ-լեյտենանտ Լևոն Երանոսյանի գործով վճիռը։

Դատարանը վճռեց Լևոն Երանոսյանի մեղադրանքները վերաորակել և նրան մեղավոր ճանաչել քրեական օրենսգրքի 375-րդ հոդվածի (իշխանությունը չարաշահելը, իշխանազանցությունը կամ իշխանության անգործությունը) 1-ին մասով նախատեսված հանցագործություն կատարելու մեջ և այդ մասով վերջինիս նկատմամբ քրեական հետապնդումը դադարեցնել՝ վաղեմության ժամկետը անցած լինելու հիմքով։ Դատարանը որոշեց նաև նրան մեղավոր ճանաչել 375-րդ հոդվածի 2-մասով հանցագործություն կատարելու մեջ և նրա նկատմամբ պատիժ նշանակվել ազատազրկում՝ 4 տարի ժամկետով։

Էրեբունի-Երևան 2800-ամյակի և Հայաստանի առաջին Հանրապետության անկախության հռչակման 100-ամյակի կապակցությամբ հայտարարված համաներման կիրառմամբ պայմանավորված՝ Լևոն Երանոսյանն ազատվեց նշանակված 4 տարվա պատժից։ Որոշում կայացվեց նրա նկատմամբ որպես խափանման միջոց չհեռանալու մասին ստորագրությունը հանել դատավճռի օրինական ուժ մտնելուց հետո։ Դատարանը նաև վճռեց կալանքից հանել Երանոսյանին պատկանող անշարժ և շարժական գույքը։

Լևոն Երանոսյանը մեղադրվում էր պաշտոնեական լիազորություններն անցնելու մեջ: Ըստ մեղադրանքի` 2018 թվականի ապրիլի 16-ին և 22-ին ՝Երևան քաղաքում անցկացված բողոքի զանգվածային ակցիաների ժամանակ, ցուցարարների նկատմամբ գործադրել է ընդհանուր առմամբ 8 հատ «Զարյա» տեսակի լուսաձայնային նռնակներ, ինչի հետևանքով 2 տասնյակից ավելի անձանց առողջությանը պատճառվել է տարբեր աստիճանի, այդ թվում` ծանր և միջին ծանրության վնաս: