Եկեք բոլորով իրար հետ հավաքվենք, ՀՀ-ն ուժեղացնենք. Սուքիասյան

Հետաքրքիր փուլում ենք ապրում: ՀՀ-ն ուզում է ուժեղանալ, ուզում է ամրապնդել իր սահմանները, ուզում է հզոր պետություն դառնալ, ՀՀ քաղաքացիները, պատգամավորները, քաղաքական կուսակցությունները խանգարում են դրան: Ես չգիտեմ՝ դրանցից շատերը միտումնավո՞ր, թե՞ չհասկանալով՝ ինչի հետ են առնչվում, ինչ գործողություն են կատարում և ինչ վատ անուն են ունենալու պատմության մեջ, որովհետև ՀՀ-ն պետք է լինի հզոր, անկախ պետություն: Այդ մասին Ազգային ժողովի՝ մայիսի 22-ի նիստի ժամանակ հայտարարեց ՔՊ խմբակցության պատգամավոր Խաչատուր Սուքիասյանը՝ անդրադառնալով ներքաղաքական զարգացումներին:

«Հաշվի առնելով մեր ունեցած տեղեկություները՝ մեզ մոտ այնպիսի մի կարծիք է ստացվում, որ մեր գործընկերները և ՀՀ-ի շատ քաղաքացիներ ծառայում են այլ պետությունների: Մի մասն ուղղակի ծառայում է պայմանագրային հարաբերությունների արդյունքում, մի մասը՝ չգիտակցելով, իր ընկերներին լսելով: Եվ եթե մենք գանք տարիներ հետո և տեսնենք, թե ՀՀ-ն ովքեր են ղեկավարել, ինչ ձևով են կառավարել, և տեսնենք, թե նրանք ինչ ձևով են վերաբերվում մարդկանց, որոնք մի օտար երկրի անուն են տալիս կամ մի օտար երկրի հետ հարաբերություն են ունենում… շատ վատ էին վարվում, կա՛մ այդ մարդիկ բանտում էին հայտնվում, կա՛մ այդ մարդիկ մահանում էին, կա՛մ այդ մարդիկ ունեզրկվում էին:

Հիմա ձեզ ասում եմ՝ եթե դուք խանգարեք ՀՀ-ի զարգացմանը, ձեզ հետ նույն գործիքներով կխոսեն: Այդ գործիքները, որը դուք կիրառել եք 20 տարի, կկիրառվեն ձեր դեմ, որովհետև ես՝ որպես ՀՀ քաղաքացի, որն ունի ընտանիք, ունի զավակներ, թոռներ, ամեն ինչ անելու է, որ ՀՀ-ն լինի հզոր, ուժեղ, իսկ մնացած հորինվածքները, որոնք հորինում եք՝ սահմանները տվին, հողերը տվին, դրանք նրա համար են, որ շատ լավ հասարակությանը գցեք մոլորության մեջ»,- ասաց Սուքիասյանը:

ՔՊ խմբակցության պատգամավորը նաև մտահոգություն հայտնեց, որ ներքաղաքական գործընթացների մեջ ներքաշված են ԼՂ-ից բռնի տեղահանվածները, ապա հիշեց 44-օրյա պատերազմից մի դրվագ. «44-օրյա պատերազմի ժամանակ միտումնավոր մարդիկ տեղերը տվել են, որպեսզի մեր զինվորներին սպանեն: Ինչո՞ւ, որպեսզի այդ ժամանակվա իշխանությունը պարտվի, որպեսզի կարողանան որոշ քաղաքական ուժեր, մարդիկ… Ես այնտեղ եմ եղել, դուք էլ գիտեք, որ եղել եմ այնտեղ, Ղարաբաղի նախագահի բունկեր էր կոչվում, այնտեղ տեսել եմ Սամվել Բաբայանին, որն այդ մտքերն ասել է այն ժամանակ գործող Ղարաբաղի նախագահին»:

Խոսքը եզրափակելով՝ Խաչատուր Սուքիասյանը դիմեց խորհրդարանական ընդդիմությանը. «Եկեք բոլորով իրար հետ հավաքվենք, ՀՀ-ն ուժեղացնենք: Իշխանության ձգտելը, չեմ կարծում, որ ստացվելու է, որովհետև ՀՀ քաղաքացիները գիտակից են, ՀՀ քաղաքացիները տեսնում են»: