ՀՀ իշխանությանը մեղադրել պատերազմ հրահրելու, պատերազմ բերելու մեջ՝ կարող է անել միայն Ալիևի փաստաբանը. Ալեքսանյան

ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանն անդրադարձավ «Հայաստան» խմբակցության պատգամավոր Գառնիկ Դանիելյանի ելույթին, ընդգծեց՝ բոլորս առիթ ունեցանք խորհրդարանի ամբիոնից լսելու այն ելույթներից մեկի նմանակումը, որոնք լսվում էին 2023-ի սեպտեմբերին ԼՂ Ազգային ժողովում:

«Գրեթե նույնական ելույթ, գրեթե նույնական բառապաշարով, բառամթերքով ու գաղափարախոսությամբ: ԼՂ Ազգային ժողովում հնչած ելույթների մեջ էլ էր, որ դաշնակցական, մերձդաշնակցական, քոչարյանական, սերժսարգսյանական ԼՂ պատգամավորները փորձում էին ՀՀ իշխանություններին անվանել ազգակործան, հողատու, իրենց էլ անվանել ազգափրկիչ, հայրենասեր: Ուզում եմ հիշեցնել, որ այդ պատգամավորներից ընտրված նախագահը ընդամենը օրեր անց ստորագրեց ԼՂ-ի լուծարման մասին հրամանագիրը: Այդ փաստն արդեն գրվել ու գրվելու է պատմության դասագրքերում, որ Լեռնային Ղարաբաղում իշխանության եկան դաշնակցական, քոչարյանական, սերժսարգսյանական ուժերը, ու նրանց կողմից ընտրված նախագահը ստորագրեց ԼՂ-ն լուծարելու մասին հրամանագիրը»,- ասաց Ալեքսանյանը:

Նրա խոսքով՝ ակնհայտ է, որ նույն մարդիկ նույնական խոսույթով փորձում են գեներացնել գրեթե նույնական պրոցես, ակնհայտ է, որ պրոցեսի վերջնարդյունքը պետք է որ նույնը լինի: Այդ նույն մարդիկ ԼՂ-ում հեռացրին ընտրված իշխանությանը, բերեցին իրենց իշխանությունը, իրենց մարդուն նշանակեցին իշխանության, հետո նրա ձեռամբ լուծարեցին իշխանությունը:

Նա պատախանեց մեղադրանքներին, թե իշխանությունը երաշխիքներ չի տալիս, ընդգծեց՝ ինքը, որպես իշխանության ներկայացուցիչ, երաշխավորում է, որ եթե այս մարդկանց նախաձեռնած պրոցեսը ինչ-որ հրաշքով հաջողի, դրա վերջնական արդյունքը կլինի մեկը՝ Հայաստանի լուծարման մասին հրամանագիրը:

«100 տոկոս երաշխիք ենք տալիս դրան: Դա ակնհայտ ճշմարտություն է, սիրելի՛ քաղաքացիներ: Աննորմալ է սպասել մի այլ բան այն քաղաքական շարժումից («Տավուշը հանուն հայրենիքի» շարժում - խմբ.), որի լիդերը, բացի Ալիևի փաստաբանը լինելուց, ուրիշ բան չի անում՝ առավոտից երեկո շրջում է ՀՀ-ով ու ասում հետևյալը՝ այս իշխանությունն է հրահրել պատերազմ, այս իշխանությունն է բերել պատերազմը: Բացարձակ փաստաբանություն, որը, կարծում եմ, Ադրբեջանի շահերի ներկայացուցիչները տարբեր միջազգային դատարաններում, ինձ թվում է, այդ ելույթների կտորները պարբերաբար կօգտագործեն իրենց պաշտպանական ճառերում ու այլ վայրերում»,- հայտարարեց Ալեքսանյանը:

Նրա խոսքով՝ ՀՀ իշխանությանը մեղադրել պատերազմ հրահրելու, պատերազմ բերելու համար՝ կարող է անել միայն Ալիևի փաստաբանը:

«Այն մարդը, որը նման բան է հայտարարում, նա ադրբեջանական ռեժիմի փաստաբանն է, ուրիշ ոչինչ»,- նշեց պատգամավորը՝ հավելելով՝ սա շարժման տարածած ստերից միայն մեկն է:

Նա հիշեցրեց՝ շարժման առաջնորդներից մեկն էլ հայտարարել էր, թե ՔՊ խմբակցության 4-5 պատգամավոր արդեն զանգել ու իրենց աջակցությունն են հայտնել շարժմանը:

Դիմելով դահլիճում գտնվող «Հայաստան» խմբակցության գործընկերներին՝ առաջարկեց մատնացույց անել այդ պատգամավորներին: «Մի հոգու ցույց տվեք, էլի, որ զանգել ու ձեզ աջակցություն է հայտնել»,- ասաց Վահագն Ալեքսանյանը:

Ինչ վերաբերում է իշխանության տված անվտանգության երաշխիքներին՝ նկատեց՝ իրենց երաշխիքները միջազգային լեգիտիմությունն են, միջազգային հանրությունը, ՀՀ-ի զարգացող հարաբերությունները ԱՄՆ-ի, ԵՄ-ի, միջազգային կարևոր գործընկերների հետ:

«Այս մարդկանց առաջարկած երաշխիքը Սամվել Շահրամանյանն է: Սիրելի քաղաքացիներ, ՀՀ-ն ինքնիշխան ու անկախ պետություն է, ու սա շատ մարդկանց դուր չի գալիս: Նաև այս պատճառով է, որ տարատեսակ ռուս պրոպագանդիստներ 2023-ին հայտարարեցին, որ Հայաստանում պետք է ընդդիմադիր շարժումը ղեկավարի Վազգեն Գալստանյանը, ում եկեղեցական անունը Բագրատ Գալստանյան է: Դրանից առաջ էլ նույն բանը հայտարարել էր Ռոբերտ Քոչարյանը՝ առանց անուն տալու: Ակնհայտ է, թե ովքեր են սպասարկում այդ շարժումը, ովքեր են կանգնած դրա հետևում: Ակնհայտ է, որ հենց այդ ամենի բերումով շարժումը մարած է»,- նշեց Ալեքսանյանը:

Նա հորդորեց ըմբռնումով մոտենալ այդ մարգինալացած ու ագրեսիվացած շարժման առաջնորդներին, տուրք չտալ նրանց կողմից հնչող ատելության խոսքին, թշնամական քարոզին, ստերին ու կեղծիքին՝ ընդգծելով՝ մեր քաղաքացիները բազմիցս ապացուցել են իրենց ողջախոհությունը, և այս անգամ ևս տուրք չեն տա օտարերկրյա ծագում ու գաղափարական հենք ունեցող շարժմանը: