ԵԽ-ն ընդունել է արհեստական ինտելեկտի կիրառումը կանոնակարգող համաձայնագիրը․ այն չպետք է օգտագործվի ժողովրդավարական ինստիտուտները խարխլելու համար

Եվրախորհրդի անդամ երկրները ընդունել են արհեստական ​​ինտելեկտի կիրառման կանոնակարգման մասին համաձայնագիրը։

Փաստաթուղթը ստորագրել են Եվրոպայի խորհրդի Նախարարների կոմիտեի նիստի մասնակիցները, նիստը Ստրասբուրգում է կայացել։

«ԵԽ ընդունել է պատմության մեջ առաջին իրավաբանորեն պարտավորեցնող միջազգային պայմանագիրը, որն ուղղված է արհեստական ​​ինտելեկտի կիրառման ժամանակ մարդու իրավունքների, ժողովրդավարության և օրենքի գերակայության ապահովմանը։ Պայմանագիրը, որը կարող են ստորագրել նաև ոչ եվրոպական երկրները, սահմանում է օրենսդրական դաշտ՝ կիրառելի արհեստական ​​ինտելեկտի համակարգերի ողջ ցիկլի ընթացքում, այն հաշվի է առնում ռիսկերը, որոնք կարող են առաջացնել արհեստական ​​ինտելեկտի համակարգերը, նպաստում է նորարարությունների պատասխանատվորեն զարգացմանը»,- նշված է պայմանագրում, որը հրապարակել է ԵԽ-ն։

Կոնվենցիան կարգավորում է արհեստական ​​ինտելեկտի օգտագործումը ինչպես պետական, այնպես էլ մասնավոր ընկերությունների կողմից, պարտավորեցնում է ստուգել նման տեխնոլոգիաներ օգտագործելիս մարդու իրավունքների չափանիշներին համապատասխանությունը, կամ արգելք է սահմանում դրանց օգտագործման վրա, եթե անհնար է ապահովել նշված պահանջը։

Պայմանագրով պահանջվում է նաև միջոցներ ձեռնարկել՝ ապահովելու, որ արհեստական ​​ինտելեկտի համակարգերը չօգտագործվեն ժողովրդավարական ինստիտուտները խարխլելու, այդ թվում՝ իշխանությունների տարանջատման, դատական ​​անկախության և արդարադատության մատչելիության սկզբունքները խաթարելու համար։

Կոնվենցիայի դրույթները պարտադիր չեն, եթե խոսքը վերաբերում է ազգային անվտանգության շահերի պաշտպանությանը։

«Կոնվենցիան չի տարածվի ազգային պաշտպանության կամ գիտահետազոտական ​​գործունեության վրա՝ բացառությամբ այն դեպքերի, երբ արհեստական ​​ինտելեկտի համակարգերի փորձարկումը կարող է խախտել մարդու իրավունքները, ժողովրդավարությունը և օրենքի գերակայությունը»,- նշված է փաստաթղթում։