Լավրովը լկտիություն է անվանել Հայաստանին Ռուսաստանից տարանջատելու ԱՄՆ գործողությունները

ՌԴ ԱԳ նախարար Սերգեյ Լավրովը Sputnik, Moscow Speaks և Komsomolskaya Pravda ռադիոկայաններին տված հարցազրույցում «լկտի» և «անամոթ» է անվանել Վաշինգտոնի և Բրյուսելի գործողությունները՝ ուղղված Հայաստանին Ռուսաստանի հետ համագործակցությունից տարանջատելուն։

Ավելի վաղ ՀՀ վարչապետ Նիկոլ Փաշինյանը հայտարարել էր, որ Մոսկվայի հետ հարաբերությունները դժվար ժամանակներ են ապրում, սակայն դրանց կարևորությունը չի կարելի գերագնահատել։

«Ինձ թվում է, որ դրանք շատ կարևոր խոսքեր են, քանի որ սա ինչ-որ չափով արձագանք է Արևմուտքի` ԱՄՆ-ի և Եվրամիության, Հայաստանը Ռուսաստանից արագացված տեմպերով անջատելու լկտի և անամոթ գործողություններին», — ասել է Լավրովը:

Նա նշել է, որ Հայաստանն ամենաշատ օգուտն է ստանում ԵԱՏՄ-ից, երկրի տնտեսության 35%-ը իրացվում է ԵԱՏՄ-ում։

«Բայց եթե վերցնենք անցած տարին, ապա Հայաստանի ապրանքաշրջանառությունը կազմել է ավելի քան 20 մլրդ դոլար՝ 37% — ը ԵԱՏՄ-ն է, 13%-ը՝ ԵՄ-ն և 3%-ը՝ ԱՄՆ-ն։ Նույնիսկ թվաբանական տեսանկյունից տեսանելի է Եվրասիական ինտեգրումից Հայաստանի օգուտը»,- հավելել է նախարարը։