ԱՄՆ Ներկայացուցիչների պալատը մտադիր է այս շաբաթ քննարկել Կիևին օգնելու առանձին օրինագիծ

ԱՄՆ Ներկայացուցիչների պալատի խոսնակ Մայք Ջոնսոնը հայտարարել է, որ այս շաբաթ մտադիր է Կոնգրեսում քննարկման ներկայացնել Ուկրաինային և Իսրայելին օգնության տրամադրման առանձին օրինագծեր:

«Այս շաբաթ մենք կդիտարկենք վերաձևակերպված և ուղղումներով լրացված առանձին ​​օրինագծեր, որոնք վերաբերում են մեր դաշնակից Իսրայելի ֆինանսավորմանը, Ուկրաինային աջակցելուն, Հնդկա-խաղաղօվկիանոսյան տարածաշրջանում մեր դաշնակիցների ամրապնդմանը»,- X սոցիալական ցանցում տեղ գրած Ջոնսոնի խոսքերից է մեջբերել «Ինտերֆաքս» գործակալությունը:

Ինչպես հաղորդում է CNN հեռուստաալիքը, Ջոնսոնը ենթադրում է, որ ԱՄՆ-ի Ներկայացուցիչների պալատն առանձին օրինագծերի շուրջ կքվեարկի ապրիլի 19-ին։