Քննարկվում է ՀՀ-ում ԵՄ դիտորդական առաքելության ժամկետը ևս 2 տարով երկարաձգելու հարցը․ Փաշինյան

Հայաստանում Եվրոպական Միության դիտորդական առաքելության գործունեության ժամկետը կարող է երկարացվել ևս երկու տարով։ Ազգային ժողովում ունեցած ելույթի ժամանակ Հայաստանի վարչապետ Նիկոլ Փաշինյանը հայտարարել է, որ քննարկվում է ԵՄ դիտորդական առաքելության ժամկետը ևս 2 տարով երկարաձգելու հարցը։ 

Վարչապետը 2022 թվականի հոկտեմբերի 6-ի Պրահայի քառակողմ հանդիպման կարևոր արդյունք համարեց Հայաստան-Ադրբեջան սահմանի երկայնքով ԵՄ քաղաքացիական առաքելության տեղակայումը, որի ժամկետը հետագայում երկարաձգվել էր 2 տարով: Հիմա քննարկվում է առաքելության ժամկետը ևս 2 տարով երկարաձգելու հարցը:

Փաշինյանն ասել է, որ Պրահայի քառակողմ հանդիպումն ընդհանուր առմամբ առանցքային նշանակություն ունի կայուն և խաղաղ Հարավային Կովկաս ունենալու գործում:

«Պրահայի քառակողմ հանդիպման ընթացքում կայացվեցին չափազանց կարևոր որոշումներ: Այն է՝ Հայաստանն ու Ադրբեջանը ճանաչում են միմյանց տարածքային ամբողջականությունն ու ինքնիշխանությունը 1991թ. Ալմաթայի հռչակագրի հիման վրա»,- ասաց վարչապետը:

Փաշինյանը Պրահայի հանդիպման հաջորդ կարևորագույն պայմանավորվածությունը համարում է այն, որ Հայաստանն ու Ադրբեջանը համաձայնել են երկու երկրների միջև սահմանագծումն իրականացնել Ալմաթայի հռչակագրի հիման վրա: Դա նշանակում է, որ Հայաստանի և Ադրբեջանի միջև նոր սահմանագիծ չի ձևավորվելու, այլ անհրաժեշտ է գետնի վրա վերարտադրել գոյություն ունեցող սահմանագիծը: Վարչապետը չափազանց կարևորեց, որ վերջերս Ադրբեջանի նախագահը վերահաստատել է իր հավատարմությունը Պրահայի պայմանավորվածություններին ու Ալմաթայի հռչակագրին: Ըստ նրա՝ սա իսկապես կարող է երկարաժամկետ կայունության և խաղաղության հիմք դառնալ:

Վարչապետը 2022 թվականի հոկտեմբերի 6-ի Պրահայի քառակողմ հանդիպման կարևոր արդյունք է համարում նաև Հայաստան-Ադրբեջան սահմանի երկայնքով ԵՄ քաղաքացիական առաքելության տեղակայումը, որի ժամկետը հետագայում երկարաձգվել էր 2 տարով: Հիմա քննարկվում է առաքելության ժամկետը ևս 2 տարով երկարաձգելու հարցը:

«Պրահայի քառակողմ հանդիպումն առանցքային նշանակություն ունի կայուն և խաղաղ Հարավային Կովկաս ունենալու գործում, և Հայաստանի ու Ադրբեջանի միջև խաղաղության հաստատման իրատեսական ու ուժեղ իրավաքաղաքական հիմք ունեցող ծրագիր է: Մինչ այս առիթ չեմ ունեցել ասելու, բայց հիմա պարտավոր եմ արձանագրել, որ այդ համաձայնությունների ձեռքբերման գործում պարզապես ահռելի է Ֆրանսիայի նախագահ Էմանուել Մակրոնի դերը: Առավել ևս այս ֆոնի վրա նախագահ Մակրոնի և Ֆրանսիայի թիրախավորումը զարմանալի, անհասկանալի և անընդունելի է ինձ և Հայաստանի կառավարության համար: Եթե Մակրոնին թիրախավորում են ԵՄ-ի քաղաքացիական առաքելությանը երկարաժամկետ մանդատ տալու համար, այդ որոշումը մնացածների նման ԵՄ-ում կայացվել է կոնսենսուսով»,-ասաց Փաշինյանը՝ շնորհակալություն հայտնելով ԵՄ բոլոր երկրների ղեկավարներին այդ որոշման համար, որ տեղի է ունեցել Հայաստանի խնդրանքով: